Hatowe itegeko rishyiraho Ibitaro bya Gisirikare n’ikigo cya Gisirikare cy’Ubwishingizi ku ndwara

Inteko Rusange y’Umutwe w’Abadepite kuri uyu wa kane, tariki ya 24 Ugushyingo 2011, yatoye amategeko abiri ashyiraho kandi akagena inshingano, imiterere n’imikorere y’ibitaro bya Gisirikare bya Kanombe (KMH) hamwe n’Ikigo cya Gisirikare cy’Ubwishingizi ku ndwara  (MMI).

 Itegeko rya MMI  riravugurura irindi ryari risanzwe rigenga icyo kigo kugirango ibyari birikubiyemo bihuzwe n’ibivugwa mu Itegeko Ngenga rishyiraho amategeko rusange yerekeye Ibigo bya Leta. Iri tegeko kandi rishingira kubikubiye mu itegeko rigenga umurimo w’ubwishingizi ku birebana n’imari shingiro y’ikigo cya Leta gikora umurimo w’ubwishingizi. 

Kubirebana n’itegeko rishyiraho Ibitaro bya Gisirikare by’u Rwanda(RMH), byari bisanzwe byitwa Ibitaro bya Gisirikare bya Kanombe, Depite Kayinamura Gedeon, Perezida wa Komisiyo y’Ububanyi n’Amahanga n’Umutekano yize iri tegeko, yibukije Inteko Rusange ko itegeko rizafasha ibitaro bya Gisirikare bya Kanombe guhinduka ikigo cya Leta kandi kibarirwa mu bitaro fatizo kuko ibisabwa byose kugirango  bijye muri icyo cyiciro byose byuzuye.

Itegeko rizahesha kandi ibitaro ubuzima gatozi bityo ntibikomeze gukoresha ingengo y’Imari ya Minisiteri y’Ingabo ahubwo icyo gihe bizagenerwa iyabyo yihariye. Iri tegeko ni n’uburyo bwiza kandi buzoroshya gukemura ibibazo by’imishahara yari hasi ku basirikare bafite impamyabumeyi zihanitse mu buvuzi kuko icyo gihe bazahembwa kimwe na bagenzi babo bakora mu bitaro bya Leta.

Nk’uko bashimye ibi bitaro ubwo Inteko rusange y’Umutwe w’Abadepite yasuzumaga ishingiro ry’imishinga y’aya mategeko, bongeye na none gushimangira no gushimira imikorere myiza y’ibitaro bya Gisirikare bya Kanombe kandi bamwe muri bo bavuga ko bazakomeza kubikorera ubuvugizi ku nzego zibishinzwe kugirango bikomeze kongererwa ubushobozi hagamijwe kubifasha kugera ku nshingano zabyo no kudatezuka kuzikora neza.

Ibitaro bya Gisirikare bya Kanombe mu Itegeko ryatowe bizahindurirwa inyito byitwe Ibitaro  bya Gisirikare by’u Rwanda (Rwanda Military Hospital).

Bernard Byukusenge
Ushinzwe Itangazamakuru mu Nteko Ishinga Amategeko