Hatoranyijwe batandatu bazahagararira Umugi wa Kigali muri {I’m The Future}

I’m the Future ni irushanwa ririmo kugenda rishaka impano nto hirya no hino mu ntara. Umugi wa Kigali wahagarariwe na batandatu bavuye mu karere ka Gicukiro, Nyarugenge na Gasabo.

Abo bana barategereza abandi 30 bagomba kuzabanza gutoranywa mu tundi turere noneho bagashyirwa hamwe hashakishwa uzegukana iri rushanwa.

Biteganyijwe ko nyuma y’Umugi wa Kigali, muri weekend hazakurikiraho utundi turere twa Ngoma, Kirehe, Rwamagana na Nyagatare.

“Future Records Rwanda” studio isanzwe ifitanye imikoranire n’abahanzi batandukanye, ku bufatanye na Miracle Transporter Ltd nibo bateguye iryo rushanwa.

Ni irushanwa rizagera mu turere twose uko ari 30. Mu ntara zose hakazaba hari cites 18 zizajya zigenda zihagararirwa n’abana babiri bazaba batsinze abandi.

Nyuma yo gutangazwa ko batsinze, umwana wa mbere azajya akorerwa Video na Audio by’indirimbo ku buntu. Uwa kabiri akorerwe Audio gusa.

Abo bana bose bazaba batsinze uko azaba ari 36, bazashyirwa hamwe igihe cy’ibyumweru bitandatu. Bakurikiranwa n’abafite ubuhanga mu muziki birimo kuririmba no kumenya uko witwara kuri stage.

Icyo gihe hazategurwa igitaramo cyo guhuriza hamwe abo bana bose uko ari 36 barushanwe. Uzatsinda abandi akazahabwa igihembo nyamukuru cy’amafaranga miliyoni cumi n’eshanu {15.000.000 frw}.

Joel Rutaganda

UM– USEKE.RW