Haracyabura abashoramari mu muziki – Gaby U

Gaby Umutare ni umwe mu bahanzi bakunzwe kandi bahagaze neza mu muziki w’u Rwanda. Ngo kuba nta mubare munini ugaragara w’abashoramari, ni kimwe mu bintu bidindiza muzika n’abahanzi nyarwanda kwagura imbago zawo.

Mu Rwanda uretse kuba hari amwe mu mazu atunganya muzika ‘Labels’ afata abahanzi, nta mushoramari ukomeye wari winjira mu muziki nk’igice gishobora kwinjiza amafaranga igihe wayashoyemo.

Ibi rero ngo ni bimwe mu bituma abahanzi bato badafite andi maboko abafasha mu iterambere ryabo badashobora kugira aho bagera ahubwo n’indirimbo yakundwa n’itangazamakuru akaba ariryo rikora ako kazi.

Umutare Gaby yabwiye Umuseke ko igihe cyose hagize abashoramari binjira mu muziki hari impinduka nyinshi zizagaragara.

Ati “ Umuhanzi udafite umufasha ngo amenyakanishe ibihangano bye ‘Manager’, abikorerwa n’itangazamakuru. Ariko umunsi hari abashoramari binjiye muri muzika nibaza ko hari impinduka nini cyane izagaragara”.

Nubwo nta na rimwe aritabira irushanwa rya Primus Guma Guma Super Star, Gaby avuga ko ari irushanwa buri muhanzi wese yifuza kuba yakandagiramo.

Mu gihe yaba agiriwe amahirwe n’abaritegura cyangwa n’abanyamakuru muri rusange, ko hari benshi mu batamuzi neza bashobora kurushaho kumumenya.

https://www.youtube.com/watch?v=ffgjXSg2K64&list=PL-4nFQ1NdFxBLT2dzAzO3nVJQkh2EGdRC

Joel Rutaganda

UM– USEKE.RW