“Hano niho mu rugo, ninaho herezo ryanjye” – Ikiganiro kihariye na The Ben

Nyuma y’imyaka itandatu ataba mu Rwanda, The Ben yaragarutse. Havuzwe byinshi we akavuga bicye. Mu kiganiro kihariye n’Umuseke yavuze ko kuri we asanga we na mugenzi we Meddy bataratorotse igihugu kuko ntacyo bari bahunze.

Aba bahanzi bari bavuye mu Rwanda mu 2010 igihe bari bakunzwe cyane mu gihugu, bagiye muri USA mu kiswe “Urugwiro Conference.” Bagiye mu butumwa bw’akazi ku mpapuro z’inzira z’akazi (Passport de Service).

Bimenyekanye ko batagarukanye n’abo bajyanye abakunzi ba muzika mu Rwanda byabaciyemo nk’igikuba, ibyavuzweho biba byinshi. Gusa The Ben yabwiye Umuseke ko atabaye umunyamerika.

UM– USEKE : The Ben ikaze mu Rwanda nyuma y’imyaka itandatu uhavuye.

The Ben : Hhahahhahaaa ahubwo murakoze kunyakira kuko si ikaze ngarutse mu gihugu cyanjye!!!

Hari ibyavuzwe mu kigenda wowe na Meddy ko mwaratorotse igihugu kubera inyungu zanyu bwite?

The Ben : Sinabivuga nko gutoroka kuko burya utoroka hari ibyo wishinja cyangwa se hari ibyo uhunga mu gihugu cyawe kandi muri ibyo byose nta na kimwe kirimo. Iyo biba bityo sinajyaga kuba ndi hano!

Ubifata ute kuba mwaragiye mu butumwa bwa leta nti mugarukane n’abo mwajyanye?

The Ben : Yeah!!!ni amakosa twakoze ndetse twanasabiye imbabazi turazihabwa. Passport de service twazisubije ambassade, ku bavugaga ko twazitorokanye sibyo. Nta yindi mpamvu n’imwe yari ibiri inyuma ahubwo twashakaga kureba ko hari ubundi bumenyi twakunguka mu buzima bwacu no mu muziki kuko ari akazi kadutunze.

Hari ibivugwa ko mutabayeho neza muri Amerika, mubayeho mute?  

The Ben: Muri Amerika mbayeho neza!! Ndi umunyeshuri kandi nkora n’umuziki. Ikiruta byose ndi umunyarwanda. Ntabwo nagiye muri Amerika ngo mbe Umunyamerika.

Ese uzasubira muri Amerika? Cyangwa uzaguma mu Rwanda?

The Ben : Hhahahahaaa!!!!!!! Nkuko Nyakubahwa Perezida wa Repubulika ahora abivuga, hariya turagenda tugahaha tugataha. Hano niho mu rugo ni naho herezo ryanjye ariko hari akazi nkifite ngomba kubanza nkarangira karimo amasomo n’ibindi.

Mu bahanzi ujya ukurikirana uwo wumva mwakorana indirimbo mu Rwanda ninde?

The Ben : Mu by’ukuri mu Rwanda hari impano nyinshi cyane!! Ariko nkumbuye kuba nakorana igitaramo na Tom Close, Dream Boys na Urban Boys.

Waba uzasubira muri Amerika ryari niba atari ibanga?

The Ben : Bidahindutse nzasubira muri Amerika tariki 16 Mutarama 2017. Gusa hari imishinga mfite inaha nshaka kubanza gukora neza. Ariko mu masezerano mfitanye na EAP ni icyo gihe ngomba gusubirayo.

Urakoze cyane The Ben

The Ben : Murakoze cyane namwe!!Ariko nsabe buri munyarwanda wese aho ari ko hari ibyo muhishiye ku itariki ya 01 Mutarama 2017 muri parikingi ya stade Amahoro i Remera mu gitaramo cya East African Party.

Joel Rutaganda

UM– USEKE.RW