Gicumbi na Esperance zazamutse mu kiciro cya mbere

Mu mikino yo kwishyura ya kimwe cya kabiri cy’irangiza mu kiciro cya kabiri amakipe ya Gicumbi na Esperance nizo zabonye amahirwe yo kuzakina muri shampionat y’ikiciro cya mbere muri ‘saison’ itaha y’umupira w’amaguru mu Rwanda.

Mu mikino yabaye kuri uyu wa 11 Gicurasi ikipe ya Bugesera yari yakiriye Gicumbi ku Kicukiro mu ishuri ryahoze ryitwa ETO, Bugesera yahuye n’ibibazo kuko bayihatsindiye 2 – 1 mu gihe mu mukino ubanza i Gicumbi yari yatsinzwe 1 – 0.

Gicumbi FC ikaba yahise ibona ticket yo kujya mu kiciro cya mbere, aho yigeze gukina ku Izina rya Zebres rikaza guhindurwa. Yo na Musanze zikaba arizo kipe abyiri zo mu Ntara y’Amajyaruguru zizakina shampionat itaha.

Kuwundi mukino wabaye none ikipe ya Esperance FC ikinira ku Kimisagara yabonye amahirwe yo gukina ikiciro cya mbere nubwo yari imaze gutsindwa 2 – 1 i Rwamagana.

Iki gitego yatsindiye i Rwamagana cyaje kiyongera ku kindi gitego bari batsinze (1 – 0) Sun Rise mu mukino ubanza i Kigali maze biba bibiri kuri bibiri ariko Esperance ukomeza kubera gutsinda igitego hanze.

Aya makipe yabonye ticket akaba azakina umukino wa nyuma wa shampionat y’ikiciro cya kabiri maze akazinjira muri shampionat y’ikiciro cya mbere itaha.

Kugeza ubu amakipe yo mu kiciro cya mbere ashobora gusezererwa ni Etincelles na Isonga FC n’ubwo hasigaye imikino itatu ya shampionat.

Amahirwe macye ya Sun Rise na Bugesera zombi zo mu Ntara y’Iburasirazuba yatumye iyi ntara ikomeza kutagira ikipe muri shampionat y’ikiciro cya mbere mu Rwanda.

JD NSENGIYUMVA Inzaghi
umuseke.rw