Gicumbi: Iterambere ry’amakoperative ngo ridindizwa n’inda nini z’abayayobora

Kuri uyu wa 19 Gicurasi, Ubuyobozi bw’akarere ka Gicumbi bwatunze agatoki abayobozi b’amakoperative  kugira uruhare mu idindira ryayo kubera ikibazo cy’imitangire mibi ya serivisi yabo itanoze. Ushinzwe iterambere muri aka karere avuga ko aba bayobozi bakwiye kureka ibyo gukubira mu nda zabo iby’abanyamuryango.

Hasozwaga icyumweru cyahariwe ubukangurambaga ku mitangire ya serivisi inoze mu makoperative bwiswe ‘nk’uwikorera’, bwateguwe n’ikigo cy’igihugu gishinzwe imiyoborere RGB.

Muri iki gikorwa cyahuje inzego zitandukanye zirimo ubuyobozi bw’akarere ka Gicumbi, RGB, RCA, amakoperative akorera muri aka karere, abayobozi b’amakoperative bagarutsweho cyane basabwa kwikubita agashyi ku mitangire ya serivisi kuko ari byo bikomeje gutuma iterambere ryayo rikomeza gucumbagira.

Umuyobozi w’akarere ka Gicumbi wungirije ushinzwe imari n’iterambere Muhizi Jules Aimable yavuze ko abayobozi b’amakoperative bakunze kurangwa n’umuco wo kwikubira.

Avuga ko bamwe mu banyamuryango b’amakoperative batabyihanganira, bagahitamo kuyavamo kuko baba babona na terambere bazageraho.

Ati “ Birababaje cyane, usanga abayobozi b’amakoperative mushaka gukubira mu nda zanyu gusa, mukirengagiza abanyamuryango, bigatuma amakoperative muhagarariye adatera imbere.”

Dusingizimana Anoilite umunyamuryango wa koperative Sobanukirwa yo mu murenge wa Shangasha, ikora gahunda yo kwizigama nyuma y’umwaka ikagura amatungo ikorozanya mu rwego rwo Guhindura Imibereho y’abanyamuryango, avuga ko amakoperative menshi yugarijwe n’ibi bibazo by’abayobozi bayo bayasahura.

Evence NGIRABATWARE
UM– USEKE.RW/GICUMBI