Gatsibo: Ruswa ‘yatswe’ abatishoboye muri gahunda yo guca Nyakatsi

Mu kuvana abantu mu nzu ya Nyakatsi bari batuyemo Leta yagiye igenera abaturage bamwe na bamwe batishoboye ubufasha burimo amabati kugira ngo bubake. Gusa bamwe mu baribayakwiye ngo kugira ngo bayahabwe bakwa ikitwa ‘Umusururu w’umuyobozi’ nk’uko byemezwa na bamwe mu batuye muri aka karere. Ibi byatumye hari bacye bakiri muri aya mazu ya nyakatsi.

Umuturage witwa ‘Mukashema’ (Izina tumuhaye ngo arindwe igitutu) yasenyewe inzu ya nyakatsi yabagamo ndetse abaturage bamuha umuganda bamwubakira inzu ubu abamo ariko avuga ko hari amafaranga yahaye umuyobozi w’Akagali atuyemo ka Bushobora mu murenge wa Remera wamubwiraga ko ari we uzamuha amabati ariko nyuma akaza kumenya ko yari agenewe abatishoboye muri gahunda ya Leta kandi kuyatanga ari ubuntu.

Avuga ko yahaye umuyobozi w’a ko kagali amafaranga 14 000Rwf  abikuye mu kugurisha ihene n’amasaka yari yejeje.

Undi muturage witwa ‘Muhizi’( nawe ni izina tumuhaye ngo arindwe igitutu) atuye mu murenge wa Remera nawe yavuye muri Nyakatsi ariko ngo umuyobozi w’umudugudu aza kumubwira ko umuyobozi w’Akagali yamutumye ngo aze amubaze uko yifite kugirango ashyirwe ku rutonde rw’abazahabwa amabati. Aha ngo bamubazaga ayo ashobora gutanga.

‘Muhizi’ yaje gutanga amafaranga 17 000Rwf ayaha umuyobozi w’u mudugudu.

‘Beatrice’ (nawe ni izina tumuhaye ngo arindwe igitutu)  nawe ni umuturage mu murenge wa Remera muri Gatsibo yabwiye Umuseke ko we yagerageje kubwira umuyobozi w’umudugudu ko ntako yifite maze ngo amuca macye.

Ati “Narabinginze (umuyobozi w’Umudugudu) mbaha ibihumbi bitanu ntakundi nari kubigenza kuko inyungu zari izanjye kugira ngo bampe amabati, nubwo nyuma naje gusanga ngo twaragombaga kuyahabwa ku buntu kuko tutishoboye.”

Kimwe n’abandi baturage bavanywe mu nzu za nyakatsi batishoboye baganiriye n’Umuseke bavuga ko bagiye batanga amafaranga ku bayobozi b’Umudugudu n’Akagali ngo babahe amabati.

Umwe avuga ko yaje kwimwa umuganda (utangwa n’abaturage ku rugo uru n’uru bisabwe n’ubuyobozi) wo kumwubakira ngo kuko yari yavugiye hanze ko abayobozi bamwatse amafaranga ngo bamuhe amabati kandi atishoboye.

Nubwo agaciro k’amafaranga batanga ari gato ugereranyije n’amabati bahabwa, aba baturage bavuga ko abayobozi bahemutse kuko baje kumenya ko ayo mabati yari agenewe abatishoboye ku buntu.

Bugabo Philbert umuyobozi w’akagali  ka Bushobora utungwa agatoki n’abaturage avugako ibintu byo kwaka amafaranga abaturage bitigeze bikorwa ko nta mafaranga batse abaturage kuko ayo mabati yari abagenewe ku butnu.

Jean Claude Ndayisenga umuyobozi w’Umurenge wa Remera avuga kuba hari amafaranga yaba yaracibwaga abaturage kugira ngo bahabwe amabati icyo kibazo atari akizi.

Uyu muyobozi akavuga kandi ko nta muturage n’umwe muri uyu murenge ugituye muri Nyakatsi.

Mme Uwimpuhwe Esperance umuyobozi w’Akarere wungirije ushinzwe imibereho myiza y’abaturage mu karere ka Gatsibo nawe avuga ko ibyo kwaka abaturage batishoboye amafaranga ku mabati bagenewe ku buntu atari abizi gusa ko bagiye gikurikirana.

Pierre Claver Nyirindekwe
UM– USEKE.RW