Gatsibo: Abayobozi bemeye ko ‘batekinitse’ ibyiciro by’Ubudehe ku baturage

Bamwe mu baturage bo mu mirenge itandukanye mu karere ka Gatsibo bavuga ko nyuma y’uko ubwabo bishyize mu byiciro by’Ubudehe nk’uko byari biteganyijwe, hari abayobozi bagiye bakabashyira mu byiciro bishakiye. Bamwe mu bayobozi b’ibanze bemereye Umuseke ko ibi koko byabayeho ngo hagamijwe kugabanya umubare w’abari mu kiciro cy’abakene cyane. Gusa abandi bayobozi bakavuga ko ibyabaye ari ugukosora amakosa yari yakozwe.

Ibyiciro bine by’Ubudehe abaturage nibo babishyiranyemo mu nama zo ku midugudu hagendewe ku makuru yari yakusanyijwe mbere n’ababihuguriwe. Ikiciro cya mbere gishyirwamo abakene cyane kugeza ku cya kane gishyirwamo abifashije.

Emmanuel Mbonigaba umuturage mu murenge wa Remera yabwiye Umuseke nyuma y’ikusanywa ry’amakuru ryakozwe na Komite z’Ubudehe abaturage bahuriye ku midugudu maze kuko baziranye ubwabo bashyirana mu byiciro hanagendewe kuri ya makuru maze abayobozi batwara amafishi.

Ati “ Ariko hashize iminsi tubona bagaruye ya mafishi ngo twabikoze nabi ngo bigomba gusubirwamo.”

Umwe mu bayobozi b’imidugudu utifuje gutangazwa amazina yavuze ko babanje guhugurwa ku buryo bwo gushyira abaturage mu byiciro by’Ubudehe ariko ngo ibyo bize muri ayo mahugurwa ntibyakurikijwe.

Ati “Ndi umwe mu bantu bahuguwe ku murenge uko tuzashyira abaturage mu byiciro by’Ubudehe, batwereka ibyo tuzagenda dukurikiza,baduha amafishi tugenda twuzuzaho ibijyendanye n’imibereho y’abaturage, ikusanyamakuru rirangiye duhamagaza abaturage bose kugirango bashyirane mu byiciro nk’uko byari biteganyijwe hashize iminsi numva ngo ubuyobozi bwo hejuru bwarabyanze.”

Akomeza ati “Amafishi yagarutse afitwe n’umunyamabanga Nshingwabikorwa w’Akagali  tubisubiramo turi kumwe n’abandi bahagarariye indi midugudu, gitifu (w’Akagali) naramubajije nti ko ndeba turimo gushyira abantu mu byiciro kandi ari bo bakabaye babyishyiramo bimeze bite? aravuga ngo hari imibare bamubwiye igomba kujya muri buri kiciro. Ifishi turazihindura ariko mu bwira ko mu mudugudu wanjye nta muntu nabonye wajya mu kiciro cya kane ahita ambwira ko bahari ahita anyaka amafishi yabo yuzuzaho kane (ikiciro cya kane) sinari gutera amahane ndamwihorera.”

Umuseke waganiriye kandi n’umwe mu bayobozi b’Akagali, nawe yemeje ko iki kintu cyabayeho ariko ntiyifuza gutangazwa.

Ati “Njyewe mbikubwiye nk’umuntu ushaka kubaka kuko byaranambabaje, ariko simbikubwiye kugirango utangaze amazina yanjye maze ngo bize ku nteza ibibazo, twebwe dufatanyije n’abaturage twashyize abantu mu byiciro dukurikije amabwiriza yari ahari  bikorwa neza turabyohereza bigeze ku karere biragaruka ngo n’uko abantu benshi bari mu kiciro cya kabiri kandi koko dukurikije amabwiriza niho twagombaga kubashyira, badusaba kubihindura.”

Arakomeza ati “Nkubwize ukuri twamaze icyumweru duhindura ibyiciro kandi twari twarabirangije mbere dufatanyije n’abaturage. Kuba hari abantu benshi bari mu kiciro cya kabiri ni uko n’ubundi bagombaga kukijyamo kuko twe twakurikije amabwiriza, gusa kuba nyuma narahinduriye abaturage nkabashyira mu kiciro kidahuye n’imibereho yabo sinabizira ni itegeko ryari riturutse ku bo hejuru.”

Consolee Urujeni Umunyamabanga Nshingwabikorwa w’Umurenge wa Rugarama yabwiye Umunyamakuru w’Umuseke ko ibi bavuga bitabayeho ahubwo abaturage ngo bakimara gushyirana mu byiciro amafishi bayatwaye kurwego rw’Akarere ariko ngo biza kugaragara ko ikiciro cya kabiri kirimo abantu benshi.

Urujeni avuga ko ngo babonye ko byabayemo amakosa biba ngombwa ko basubira mu midugudu baganira n’abaturage bababwira ko amakuru babahaye biragaragara ko atari ukuri maze ngo bafatanya nabo kubivugurura.

Jean Claude Ndayisenga Umunyamabanga Nshingwabikorwa w’umurenge wa Remera we avuga ko abaturage aribo ubwabo bagiye bashyirana mu byiciro ko abaturage batishimiye ikiciro cy’ubudehe barimo bagana ubuyobozi bukabafasha.

Inshuro zose Umuseke wagerageje kuvugana n’umuyobozi ushinzwe imibereho myiza mu karere ka Gatsibo kuri iki kibazo ntibyashobotse.

Pierre Claver Nyirindekwe
UM– USEKE.RW