Gashayija arangije kuzenguruka u Rwanda ku igare mu minsi 50

*Yakoresheje amafaranga 38 000Frw gusa
*Yinjiye muri Nyungwe saa munani ayisohokamo saa tanu y’ijoro
*Urugendo rwe yarwise ‘Peace Trip”

Saa sita zirenzeho iminota micye Patrick Gashayija uzwi nka Ziiro the Hero yari yambutse ikiraro cya Nyabarongo ageze mu mujyi wa Kigali, uyu munsi iminsi 50 yari yuzuye ariho azenguruka u Rwanda n’igare rye. Yabwiye Umuseke ko yumva yishimye bidasanzwe kubwo kumenya igihugu cye kurushaho.

Uyu musore urugendo rwe yaruhereye i Kigali yerekeza mu Bugesera azenguruka uturere twose Iburasirazuba, afata Intara y’Amajyaruguru, amanuka iy’Uburengerazuba yose aciye Pfunda na Rutsiro agera i Rusizi, ahava yinjira mu majyepfo Intara ashoje mu kanya kashize yambutse Nyabarongo agaruka i Kigali.

Nta karere k’u Rwanda ataciyemo kuri kaburimbo cyangwa mu nzira z’ibitaka.

Acyambuka Nyabarongo yaganiriye n’Umuseke, ati “Ni ibyishimo ikomeye cyane kuri njye, byari bikomeye ndetse nageze aho numva ncitse intege ngiye kubivamo. Ariko ndihangana ndakomeza.”

Urugendo ruva Rusizi nirwo rwamuvunnye kurusha izindi zose. Ati “byari bikomeye cyane. Navuye Rusizi ngera Gisakura ahagana saa munani, ninjira muri Nyungwe mvuga nti amasaha atandatu nka saa moya ndaba nsohotse ishyamba.

Ariko nagezemo mpura na challenge ikomeye y’imisozi kuko ugaruka uva Rusizi muri Nyungwe henshi harazamuka. Byageze aho n’ijoro riragwa nawe urabyumva, ubwoba, umunaniro, ncana amatara nari mfite agera aho arazima.

Aha niho nageze ndavuga nti bajyaga bambwira ngo sinzabishobora ariko noneho dore aho binaniriye. Ariko nkagira ntya nkabona igikamyo kinciyeho nkongera nkavuga nti ndabona ndikumwe n’abantu.

Umusozi witwa k’Uwinka niwo wamvunnye cyane, nageze ahantu mu ishyamba mpura n’abasirikare bari ku kazi ndababaza nti ese nsigaje igihe kingana gite ngo nsohoke mu ishyamba, nabo bati usigaje nk’iminota 30 gusa, ariko kuva aho nongeye kugenda andi masaha abiri. Urebye nabo banteraga akanyabugabo ngo nkomeze. Nageze ku Kitabi neza neza saa tanu z’ijoro, ndakambika ndaruhuka.”

Ziiro The Hero yakomeje mu turere twa Nyamagabe, Nyaruguru aciye Kibeho na Cyahinda na Nyakizu agera ku Kanyaru agaruka muri Huye na Nyanza, Ruhango, Muhanga na Kamonyi.

Ku biro by’Akarere ka Kamonyi yahageze ejo kuwa kane hakiri kare aruhuka neza umunsi wose nijoro araryama ngo yitegura kwinjira muri Kigali uyu munsi atananiwe.

N’ibyishimo ku maso uyu musore w’imyaka 27 warangije amashuri ya Kaminuza mu Buhinde yaganiriye n’Umuseke aha kuri Nyabarongo akirangiza urugendo rwe. Avuga ko abanyarwanda bakwiye kumva ko ubukerarugendo atari ubw’abanyamahanga gusa kandi budakorerwa mu mahanga gusa.

Ati “Hari aho nageraga bakamvugisha mu giswahili, abandi bakambwira igifaransa cyangwa icyongereza, ahenshi ntibumvaga ko ndi umunyarwanda. Bakumva mvuga ikinyarwanda bakavuga bati ese uyu ubu ari mu biki? abandi bati ari kurya amafaranga ye, abandi bati hari uwamutumye n’ibindi….

Ariko ubukerarugendo nk’ubu ntibusaba amafaranga menshi kuko mu rugendo rwose iminsi 50 nkoresheje amafaranga ibihumbi 38 gusa, naryaga rimwe ku munsi kandi nkakoresha amafaranga macye ubundi nkarya utuntu nagendanye nka biscuits natwo twageze aho turashira nkajya ngura ibijumba nakumva ko nkeneye amavuta nkagura avocats…gutyo..

Kandi numvaga nishimye nta kibazo kuko burya iyo udakora nibwo urya byinshi, ariko kuko nabaga ntekereza urugendo ndiho n’amatsiko mfite y’aho ngiye gukurikizaho ntabwo naryaga cyane.

Ubukerarugendo nk’ubu ni bwiza kandi ntibuhenze ariko busaba determination (kwiyemeza)”

Ziiro The Hero avuga ko aho yaciye hose mu Rwanda yakirwaga neza, ndetse ngo hari aho yasangaga barumvise uru rugendo rwe bakamwishimira cyane. Avuga ko u Rwanda ari igihugu cy’amahoro n’umutekano kuko nta na hamwe yigeze agira ikibazo cy’umutekano. Hose bamwakiraga neza. Ndetse ubu ngo yongeye gukora uru rugendo aho yaciye noneho bamwishimira bikomeye kuko yahasigaga inshuti.
None rero….

Uyu musore avuga ko nyuma yo kurangiza uru rugendo agiye gutegura ubukangurambaga hose mu gihugu aho azajya ajyana n’ikipe y’abahanzi 16 bagakora ibitaramo by’urubyiruko bakaruha ubutumwa bukubiyemo amahoro no gukunda igihugu cyabo.

Avuga ko avanye ubunararibonye bunini mu kuzenguruka u Rwanda ku igare, ntawe basiganwa kandi nta kindi kimusunitse uretse amatsiko yo kumenya kurushaho igihugu cyamubyaye.

Ibyo yavanye muri uru rugendo rwe yise Peace Trip n’ubutumwa bundi yumva yaha urubyiruko cyane cyane ku mahoro ngo nibyo agiye gukomerezaho mu gihugu hose afatanyije noneho n’abandi atijyanye n’igare rye gusa.

Photos © Evode MUGUNGA/UM– USEKE

Jean Pierre NIZEYIMANA
UM– USEKE.RW