G.Umutare yibaza impamvu muzika nyarwanda itamenyekana mu Karere

Umutare Gaby umwe mu bahanzi barimo kugenda barushaho gukundwa cyane mu njyana ya Afrobeat na R&B mu Rwanda, ngo ntazi impamvu muzika nyarwanda idafata mu Karere k’Afurika y’Iburasirazuba kandi hari abahanzi benshi bashoboye.

Avuga ko mu Rwanda hari abahanzi benshi bakora injyana zitandukanye kandi b’abahanga. Ariko hibazwa ikibura ngo bamenyekane mu bindi bihugu nkuko abahanzi bo hanze bakundwa mu Rwanda.

Imwe mu mpamvu akomeza avuga ko yaba ibitera, ngo byaba ari uko yaba Uganda, Tanzania na Kenya bakunda kumenyekanisha abahanzi babo cyane kurusha abanyamahanga.

Mu kiganiro na Umuseke, Gaby yatangaje ko umunsi u Rwanda rwagize abahanzi barumenyekanisha mu Karere nta kindi gihugu kizongera kumvikana.

Yagize ati “Usanga henshi mu bihugu duturanye ushobora no kumubaza umuhanzi w’umunyarwanda akakubwira ko nta n’umwe azi. Ariko nyamara twe mu Rwanda umuhanzi w’umunyamahanga tumumenya umunsi wa mbere yashyize hanze indirimbo.

Umuntu ashobora kwibaza niba mu ndirimbo z’abahanzi nyarwanda zose ari mbi nta n’imwe ishobora gukinwa ku ma radio yo hanze cyangwa ama television mpuzamahanga.

Gusa umunsi hagize ugira amahirwe akamenyekana, niyo nziza ya mbere izatuma abahanzi nyarwanda batangira gufata amafaranga y’ibitaramo byo hanze”.

Gaby akomeza avuga ko abahanzi nka Alpha Rwirangira na Meddy aribo bashobora kuzagura umupaka wa muzika nyarwanda. Bitewe nuko ahanini aribo bahanzi basa n’abafite abafana benshi.

Kuri ubu Umutare Gaby yatangiye kugenda akora ibitaramo hirya no hino mu bigo by’amashuri. Ari naho hantu hagiye hazamura abahanzi bamwe na bamwe b’abanyarwanda.

[youtube url=”https://www.youtube.com/watch?v=x6GJoXDpV04″ width=”560″ height=”315″]

Joel Rutaganda

UM– USEKE.RW