Fumbwe: Abaturage basibuye umuhanda wa Km 2 mu muganda rusange

Mu muganda w’igihugu wa buri wa gatandatu wa nyuma w’ukwezi, abaturage bo mu tugari tune tw’Umurenge wa Fumbwe mu karere ka Rwamagana bakoze umuhanda wa Km 2 mu kagari ka Nyarubuye, Umuyobozi w’Akarere yabasabye kumenya ko Leta hari abo yacukije bagomba gutanga ubwisungane mu kwivuza bakabutangira igihe, kuko ngo kugenda nta mutuelle ni nko kwiyahura.

Mu bwitabire bukomeye, abagore n’abagabo, na bamwe mu rubyiruko bo mu tugari twa Mununu, Nyarubuye na Sasabirago, bahuriye mu muganda mu mudugudu wa Murambi n’abayobozi b’umurenge wa Fumbwe n’ab’Abakarere ka Rwamagana barimo na Mayor Mbonyumuvunyi Rajab.

Mukandutiye Saverina w’imyaka irenga 45 wakoze umuganda yatangarije Umuseke ko umuganda rusange abagore bagomba kuwitabira bagahura n’abandi bakaramukanya kandi bakubaka igihugu.

Avuga ko we yakoraga cyane kubera morale y’abandi kandi ngo yari yishimiye gukora ibikorwa byubaka igihugu.

Iryivuze Annonciata w’imyaka 32 akaba anashinzwe iterambere mu mudugudu wa Murambi, we ngo akunda gukora umuganda ku buryo itariki yawo igera yararambiwe. Umuganda ngo ufasha guhuriza hamwe abantu, bakaganira ku ngingo runaka iteganyijwe ariko banakoze.

Ati “Umuganda nawushishikariza abandi kuko abo nyobora sinagenda mbasize mu ngo, mbanza kubahwitura cyane cyane abagore kuko umuganda ni igikorwa cyiza.”

Mayor Mbonyumuvunyi Rajab yatangarije Umuseke ko umuganda wabaye mwiza kuko hakozwe umuhanda uri hagati ya km 2 na km 3. Avuga ko uko babara agaciro k’umuganda ngo bakuba igiciro cy’umubyizi umuturage akorera n’uko ubarwa mu Burasirazuba bagakubisha n’uko abaturage bangana, bityo ngo uyu muganda wari ufite agaciro kanini.

Mu nama y’umuganda, Umunyamabanga Nshingwabikorwa w’Umurenge wa Fumbwe, Mutabazi yavuze ko ahakorewe umuganda mu kagari ka Nyarubuye ari ahantu hari hatuwe n’abakene benshi, ku buryo ngo ebenshi bangana na 40% ari Leta yabatangiraga amafaranga y’ubwisungane mu kwivuza.

Yavuze ko ngo uyu muganda washyizwe hano kugira ngo bashishikarize abaturage gutanga ubwisungane mu kwivuza kuko abenshi Leta ubu yabacukije, ariko ngo uyu muhanda wakozwe uzoroshya n’ubuhahirane hagati y’utugari.

Mu gihe ahandi mu mirenge batanze ubwisungane mu kwivuza, ubu ngo bakaba bamaze kugera kuri 60% no kuzamura, aha muri Fumbwe ho ngo ubwitabire bugeze kuri 31,5%.

Mbonyumuvunyi Rajab Umuyobozi w’Akarere ka Rwamagana yasabye abaturage gutanga ubwisungane mu kwivuza kuko ngo ni byo bishobora kubaha amahirwe yo kwivuza biboroheye.

Ati “Iyo umuntu agiye kubyara nta bwisungane mu kwivuza afite bamuca Frw 120 000. Nsanze umugore atwite nkabona nta bwisungane mu kwivuza afite nagira ubwoba bwo kumutwara mu modoka kuko bashobora kunyishyuza ayo mafaranga, ariko iyo ufite ubwisungane mu kwivuza ntawagira ubwoba bwo kugutabara.”

Yavuze ko umuntu ufite ikarita y’ubwisungane mu kwivuza acibwa amafaranga 200 ya “ticket moderateur” iyo agiye kwivuza ndetse uwabyaye neza akaba atarenza amafaranga 600, bityo ngo umuntu wese yakwemera kumutabara kuko ayo mafaranga yanayishyura bibaye ngombwa ko umurwayi ayabura.

Ati “Umuntu udafite ubwisungane mu kwivuza no kumugirira neza ntibyoroha. Kutagira ubwisungane mu kwivuza ni nko kugenda udafite ubuzima. Ni nko kwiyahura muri Muhazi.”

Mbonyumuvunyi yanasabye abaturage kwitegura igihembwe cy’ihinga A kuko ngo hashize igihe haba ikibazo cy’imvura icika kare, asaba ko abaturage batangira gutegura imirima, bakaba bagejejemo ifumbire kare n’amasinde akaba ahora.

Ubundi butumwa bwatangiwe muri uyu muganda ni ubwo gufatanya nk’ababyeyi bakabuza ko abana babo bajya i Kigali no mu yindi mijyi kubayo inzererezi, ngo umubyeyi uzamenyekana ko umwana we ari inzererezi azajya ahanwa.

Amafoto @HATANGIMANA /UM– USEKE

HATANGIMANA AAnge Eric
UM– USEKE.RW