Frank Joe azaza gukora audition ya BBA izabera mu Rwanda

Rukundo Frank umuhanzi uzwi nka Frank Joe uba muri Canada aho akora ibijyanye no kumurika imideri no gukina filimi, ni umwe mu bantu bazwiho cyane ubuhanga mu gususurutsa imbaga n’imibanire myiza, azaza mu Rwanda gukora igeragezwa ry’abazitabira irushanwa rya ‘Big Brother Africa’ BBA.

Ni nyuma y’aho benshi mu bantu bakurikira imyidagaduro mu Rwanda bagiye bavuga ko yaba umukandida mwiza wahagarariye u Rwanda muri ariya marushanwa, kimwe na bagenzi be barimo Mc Tino, Nkusi Arthur na Anita Pendo.

Frank Joe yabwiye Umuseke ko agiye gukora ibishoboka arebe uko yazaza gukora audition izabera i Kigali ku itariki ya 9 Nyakanga 2014 muri Lemigo Hotel.

Yagize ati “Ntabwo narinzi neza igihe izabera mu Rwanda, ariko ngiye kugerageza nshake uko nza nzabe mpari”.

Abajijwe niba akazi akora muri Canada gashobora kuba kamwima uruhushya, yavuze ko yanakareka ariko akaza guhagararira u Rwanda muri ryo rushanwa.

Nkuko bari bashyizwe mu majwi y’abantu bashobora kwitwara neza muri iryo rushanwa, Mc Tino, Arthur na Anita bazajya muri iryo geragezwa.

Ni ku nshuro ya 9 iri rushanwa rigiye kuba, bikaba inshuro ya mbere u Rwanda rugiye kugira abakandida baruhagarariye.

Umuntu utsinda iri rushanwa yegukana akayabo kagera ku 300.000 USD. Asaga hafi miliyoni 200 z’u Rwanda. Pearl Mathews wo muri Namibia niwe uherutse kwegukana iri rushanwa umwaka wa 2013.

Joel Rutaganda
ububiko.umusekehost.com