France: Urukiko rwashyigikiye ko Bagabo yoherezwa mu Rwanda kubazwa Jenoside

Urukiko rw’ahitwa Poitiers mu burengerazuba bw’Ubufaransa rwatanze umwanzuro ushyigikira ko Innocent Bagabo ukekwaho kugira uruhare muri Jenoside yakorewe Abatutsi yoherezwa kuburanira mu Rwanda. Uyu yamaze guhabwa ubwenegihugu bw’Ubufaransa ndetse Amnesty International imufasha mu kugira ngo atoherezwa.

Nk’uko bitangazwa n’ikinyamakuru Le Parisien, mu gihe kinini gishize Ubufaransa bwinangiye kohereza abakekwaho gukora Jenoside ngo baburanire mu Rwanda, gusa uru rukiko rwa Poitiers rwo ngo rwatanze umwanzuro ushyigikira ko uyu Bagabo yoherezwa mu Rwanda.

Bagabo w’imyaka 49 ashinjwa kwicwa Abatutsi n’amaboko ye akoresheje umupanga ndetse na za grenade. Uyu nyamara ngo nyina yari umututsikazi naho se akaba yari umuhutu.

Nyuma ya Jenoside ngo yahungiye muri Tanzania, nyuma gato agaruka mu Rwanda maze ahita asaba ubuhungiro mu Bufaransa.

Bagabo mu kwiregura kwe avuga ko ngo ubuyobozi bw’u Rwanda bwababajwe n’uko yanze gutanga ubuhamya bushinja bamwe mu bakoze Jenoside.

Ubufaransa kugeza ubu bwakomeje kwanga kohereza uyu mugabo hashingiwe ku mwanzuro w’Urukiko rusesa imanza mu kwezi kwa kabiri 2014 wabyangiriye.

Abanyamategeko baracyashingira ku kuba ngo ubwo Jenosie yabaga mu Rwanda nta tegeko ryayihanaga ryariho mu mategeko ahana y’u Rwanda.

Damien Roets umunyamategeko w’Umufaransa we avuga ko iyo ngingo n’izindi zishingirwaho n’Ubufaransa zidafite ishingiro rifatika kuko u Rwanda mu 1948 rwarasinye amasezerano mpuzamahanga yamagana ibyaha bya Jenoside.

Innocent Bagabo yakomeje guhabwa ubufasha, cyane cyane na Amnesty International ngo ntiyoherezwe kuburanira mu Rwanda.

Innocent Mugabo

Innocent Bagabo yavukiye i Gahini mu karere ka Kayonza mu cyahoze ari Komini Rukara. Mu gihe cya Jenoside akaba yari umwalimu muri groupe scolaire de Gahini.

Minisiteri y’Ubutegetsi bw’igihugu mu Bufaransa niyo ifite ijambo ryanyuma ku iyoherezwa ry’uyu mugabo, kimwe n’abandi benshi bashinjwa gukora Jenoside mu Rwanda.

UM– USEKE.RW