France- Abakekwaho genocide bashyizwe ku karubanda.

Muri kimwe mu biganiro bisanzwe binyura kuri France 2, cyitwa La Grande Traque, berekanamo uburyo abantu bashinjwa ibyaha bikomeye byibasiye inyoko muntu baba bashakishwa ku isi hose, byagaragaye ko hari bamwe mu banyarwanda bashinjwa kuba baragize uruhare muri jenoside bakidegembya hirya no hino, cyane cyane mu gihugu cy’ubufaransa.

Muri iki kiganiro hari hatumiwemo Alain Gauthier uyobora umuryango CPCR w’abaregera indishyi ku barokotse Jenoside, umunyamategeko Filip Reyntjents wigisha muri Kaminuza ya Anvers mu Bubiligi akaba yaranditse ibitabo byinshi k’u Rwanda, Maria Malagardis, umunyamakuru akaba n’umwanditsi, ndetse na Jacques Kabale, Ambasaderi w’u Rwanda mu Bufaransa.

Ikiganiro cyabimburiwe na Filime yerekana bamwe mu bagize uruhare muri jonoside yakorewe abatutsi muri 1994, uko babayeho mu gihugu cy’ubufaransa, bakaba bakomeje kwidegembya badashyikirizwa inkiko.

Muri iyi filime yiswe “Génocide Rwandais: Des tueurs parmi nous?” ikaba yarakozwe n’umunyamakuru Manolo d’Arthuys. Yagaragaye mo uwahoze ari umufasha wa Habyarimana Agathe Kanziga n’umuhungu we Jean Luc, uwahoze ari umusirikare mu gihe cya Jenoside Lt Col Marcel Bivugabagabo na Dr Charles Twagira, wari umuganga ku bitaro bya Kibuye bose bakaba bibera mu Bufaransa, aba bose bakaba bagaragaye muri iyi filime  basubiza  ibibazo babazwaga k’uruhare umuryango wabo waba waragize muri jenoside.

Nkuko byagiye bitangazwa n’abatanga buhamya benshi, bashinja Agathe Kanziga kugira uruhare mu gutegura no gushyira mu bikorwa Jenoside, cyane cyane ko yari umugore w’umukuru w’igihugu, akaba n’inshuti y’interahamwe ruharwa Kabuga Felicien , tukaba twabibutsa ko uyu Kabuga ashakishwa bukware na Leta z’unze ubumwe z’Amerika kubwo icyaha cya Jenoside aho yatanzweho miliyoni 5 z’amanyamerika  kuzatanga amakuru yaho aherereye. Agatha akaba yagaragaye ahakana yivuye inyuma ibyo yashinjwaga byose, n’ubwo abaturanyi be barokotse jenoside, bamushinja kuba yaragize uruhare runini mu bwicanyi bwakorewe abatutsi mu Rwanda.

Dr Charles Twagira ushinjwa cyane n’abanyururu bafungiye muri gereza ya Kibuye bose baregwa ibyaha bya jenoside, harimo ndetse n’uwahoze ari burugumesitiri murizimwe mumakomini ya Kibuye, nawe yashinje Twagira, kuba yaratanze itegeko ryo kwica abantu bari bari mu bitaro yari abereye umuyobozi. Dr Blam wakoranaga na Twagira, nawe yavuze ko yamwiboneye atanga itegeko ryo kwica umuryango wa Camille nawe bari bafatanyije umwuga, nyuma yo kuba baramusabye imbabazi bikanga bikaba ibyubusa. Nyamara Twagira we ibyo byose bamushinjaga yabigaramye, avuga ko yiteguye kuzisobanura imbere y’amategeko.

Lt. Col. Marcel Bivugabagabo nawe ushinjwa n’abantu batari bake, cyane cyane abafungiwe muri gereza ya Ruhengeli kuba yaragize uruhare rukomeye mu gushishikariza no gutanga imyitozo ya gisirikare k’urubyiruko, arutegura kuzakora jenoside, ntiyigeze yemera ibyaha byose bamushinjaga.  Asabwe gutanga akanya nibura gato ngo bamubaze ibijyanye na jenoside yakorewe abatutsi muri Mata 1994, nk’ umunyarwanda wabagayo icyo gihe, yabasubije ko ntamwanya yabona wo kuvugana nabo. Bigaragare ko yashatse kubihisha, n’ubwo uwububa abonwa n’uhagaze.

Mu kiganiro cyabaye nyuma gato ya filime, cyari kigizwe na Alain Gauthier, Filip Reyntjents, Maria Malagardis, ndetse na Ambasaderi w’u Rwanda mu bufaransa Jacques Kabale, buri wese yagiye avuga uko atekereza kuri bamwe bakidegembya k’ubutaka bw’ubufaransa kandi baragize uruhare muri jenoside. Nkuko Alain Gauthier yatangiye avuga, yasabye ko leta y’ubufaransa yari ikwiye gushyikiriza u Rwanda abantu bose baregwa kugira uruhare muri jenoside bakaburanishwa, cyangwa se bakaba banashyikirizwa urukiko mpanabyaha rwashyiriwe ho u Rwanda rukorera Arusha.

Ambasaderi w’u Rwanda mu bufaransa Jacques Kabale nawe yunze murye, ati birakwiye kohereza abantu bose bakekwaho ibyaha bya jenoside mu Rwanda, bakaburanishwa n’inkiko kubyaha bashinjwa. Abajijwe kuko abona umubano w’u Rwanda n’ubufaransa wifashe, yasubije ko abona umeze neza, cyane cyane ko mu bimenyetso byerekana imibanire myiza ari imigenderanire y’ibihugu byombi, ko kandi kuba ariyo nabyo byerekana umubano mwiza u Rwanda rufitanye n’ubufaransa.

Yasoje asaba leta y’ubufaransa kuba yafasha u Rwanda gufata no gucira imanza abaregwa ibyaha bya jenoside bakidegembya k’ubutaka bw’ubufaransa, cyangwa bakaba bakoherezwa mu Rwanda bagacibwa imanza. Dore uko abyivugira:

Kanda hano wumve uko ambasaderi w’u Rwanda mu bufaransa asobanura ibyo umubano w”u Rwanda n’ u bufaransa

umuseke.com