“FDLR nitava ku izima tuzakomeza kuyigabaho ibitero”- Lambert Mende

Ingabo z’Umuryango w’Abibumbye ziri mu butumwa bw’amahoro muri Repubulika iharanira Demokarasi ya Congo ku bufatanye n’Ingabo z’iki gihugu kuwa 12 Werurwe 2014 bagambye ibindi bitero ku birindiro by’umwutwe w’inyeshyamba za FDLR, wiganjemo abasize  bakoze Jenoside yakorewe Abatutsi mu Rwanda.

Leta ya Congo ivuga ko kugeza ubu FDLR iri muri bintu bikomeye bituma amahoro arambye atazapfa kugerwaho mu gace k’Uburasirazuba bwa Congo  gakungahaye ku mabuye y’agaciro.

Lambert Mende, umuvugizi wa guverinoma ya Congo yagize ati:” FDLR banze gushyira intwaro hasi, niyo mpamvu turimo kubagabaho ibitero, kandi ntituzahwema  kugeza igihe bemereye kuva ku izima”.

Akomeza agira ati:”Nti turi twenyine, ku bufatanye na  Monusco,  tugomba kurangiza iki kibazo kuko abaturage bacu ari bo bahazaharira.”

Col Felix Basse, umuvugizi w’Ingabo za MONUSCO  ziri mu butumwa bwo guhashya inyeshyamba muri Congo  yavuze ko ingabo z’Umuryango w’Abibumbye zohereje abasirikare muri pariki ya Virunga mu Majyaruguru y’Intara ya Kivu ziri kumwe n’ingabo z’igihugu cya Congo kugira ngo bahangane na  FDLR.

Agira ati:”kuva ku cyumweru, twatagiye kohereza ingabo zacu muri kariya gace,  kugeza ubu hamaze gupfa inyeshyamba ebyiri”.

Basse akomeza avuga ko MONUSCO  ifite gahunda yo gukomeza kurwanya inyeshyamba zikorera muri iki gihugu kugeza zihashize ngo kuko bari mu butumwa bwo kurinda umutekano w’abaturage no kongera gushyiraho inzego z’ubuyobozi .

Inyeshyamba za FDLR zimaze  hafi imyaka 20 ziri mu mashyamba yo mu Burasirazuba bwa Congo aho zishinjwa guhungabanya umutekano w’abaturage  b’iki gihugu ndetse n’ab’u Rwanda.

Izi nyeshyamba kandi zinashinjwa ibyaha byo kwica abasivile no gusambanya abagore n’abakobwa ku ngufu.

Inyeshyamba za FDLR zigizwe ahanini n’abahoze ari abasirikare b’u Rwanda  mbere ya Jenoside yakorewe Abatutsi n’abandi Banyarwanda bahungiye muri Congo ubwo Jenoside yahitanye miliyoni irenga y’Abatutsi yendaga kurangira .

ububiko.umusekehost.com