Fazzo nawe yavanye ikirenge muri Touch Records

Touch Records ni imwe mu mazu yari amaze gushinga imizi mu bikorwa by’abahanzi bakomeye mu Rwanda. Kuri ubu Fazzo yayisohotsemo akurikira abandi byari bimaze iminsi bitangajwe ko bamaze gusohoka muri iyo nzu.

Nyuma y’inkubiri y’isohoka ry’abahanzi barimo umuraperi Green P waje gukurikirwa n’umuhanzikazi Tony mu gihe gito na Producer Junior Multsysteme nawe akaza kugenda, Fazzo nawe yasohotse muri iyo nzu.

Imwe mu mpamvu yagiye ivugwa cyane akaba ari uburyo umwe mu bashinzwe ibikorwa by’iyi nzu yakunze kugenda agaragaza ibisa n’abagasuzuguro kuri aba bahanzi.

Kugeza ubu Producer Fazzo akaba yamaze kugirana amasezerano n’indi nzu itunganya muzika yitwa ‘Grace Studio’ iyoborwa na Auddy Kelly umwe mu bahanzi nyarwanda.

Amakuru agera ku Umuseke akaba avuga ko Fazzo yaba yasinye amasezerano y’imyaka igera kuri ibiri ku mafaranga impande zombi zanze gutangaza.

Mu kiganiro na Umuseke, Auddy Kelly yatangaje ari ibintu byo kwishimira ku ruhande rwe kuba agiye gukorana na Fazzo umwe mu ba producer avuga ko yemera imikorere yabo mu Rwanda.

Yagize ati “Producer Fazzo ni umwe mu ba producer u Rwanda rufite bazi akazi mu buryo bushoboka. Kuba rero namaze kumuzana ngo dukorane mpamya ko akazi kagiye kurushaho gukorwa neza”.

Fazzo yagiye amenyekana mu ndirimbo z’abahanzi nka Bruce Melodie na Gisa Cy’Inganzo kubera ahanini bakundaga kuvuga izina rye mu ndirimbo zabo.

Joel Rutaganda

UM– USEKE.RW