EWSA ngo irangiza imyaka y’abaturage

MUHANGA: EWSA iravugwaho kwangiza imyaka y’abaturage mu gishanga cya Rugeramigozi

Abahinga igishanga cya Rugeramigozi barinubira uburyo ikigo cya leta gishinzwe amazi n’umuriro EWSA kiri kwangiza imyaka yabo bahinze  mu mushinga wacyo wo gucukura umuyoboro w’amazi ujya ku ruganda ruyatunganya ruherereye I Gihuma ho mu murenge wa Nyamabuye.

Uyu muyoboro muremure uri gucukurwa uvanwa mu cyuzi kinini cyagenewe kuhira umuceli uteye muri iki gishanga ugana ku kigo gitunganya amazi  kiri I gihuma, nkuko bigaragara hari amatiyo yanyujijwe mu myaka y’abaturage ibi rero akaba aribyo abahinga muri iki gishanga batishimiye ndetse babona nk’akarengane bagiriwe bakaba bibaza uko bizabagenda nkuko twabitangarijwe na bamwe mu baturage bahinga muri iki gishanga.

Matabaro twahasanze yatangarije Umuseke agira ati:  “n’ukuri twararenganye amashu yacu yari amaze kwera none banyujijemo imiyoboro y’amazi”.  Yakomeje avuga ko bakoze inama kuri uyu wa kabiri na president wa koperative yabo ihinga umuceri (KIABR ) Bwana Nyandwi Gaspard ababwira ko hari gahunda iteganyijwe yo kubishyura ariko ntiyizewe neza kuko batazi uwo bazishyuza.

Ubundi muri iki gishanga cya rugeramigozi hahinzemo umuceri  igice kinini ariko hari n’igice kegereye kaburimbo gihinzemo amashu ari nacyo cyahuye n’iki kibazo. Abaturage bo ngo nta muyobozi  n’umwe baravugana nawe ngo ababwire uko iki kibazo kizakemuka. Hari abakozi ba EWSA bababwira ko nubwo bahinzemo amashu ibi bitari biri muri gahunda y’iki gishanga.

Ibi rero bikaba bibangamiye abaturage bavuga ko uwo umusaruro wabo wangijwe dore ko ari nawo wa mbere. Ikindi aba baturage batumva ni ukuntu  amazi yahawe ikigo cya EWASA kandi umushinga PPMER wari wababwiye ko aya mazi azajya abafasha kuhira imyaka yabo

Ku ruhande rwa EWSA baratangaza ko nta cyizere cyo kwishyurwa batanga, ngo impamvu bari gukora ibi n’ukugira ngo bafashe abaturage bo mu mugi wa muhanga kubona amazi abahagije, bakaba rero bakoresha amazi yo muri kiriya gishanga ariko hatanirengagijwe n’icyo yagenewe. Abaturage bahinga  iki gishanga bakaba bafite impungenge yuko amazi azababana make dore ko tugeze no mu gihe cy’icyi.

MUKATETE Paulette
Umuseke.com