Ese ‘Active’ yajyanywe muri Guma Guma kubera kubyina gusa?

Itsinda rya ‘Active’ rigizwe n’abasore bagera batatu aribo, Derek ,Tizzo na Olivis, nyuma y’igihe kingana n’amezi agera kuri atandatu bishyize hamwe aho buri umwe yakoraga muzika ku giti cye ubu bari mu bahanzi 15 bakunzwe cyane mu Rwanda.

Byateye abantu kwibaza impamvu iri tsinda ryaba ryaragaragaye mu bahanzi 15 bafite amahirwe yo gutoranywamo abahanzi 10 bazitabira irushanwa rya Primus Guma Guma Super Star IV.

Hari abavuga ko imwe mu mpamvu zatumye Active ishyirwa muri PGGSS IV ari uko bakoze indirimbo zakunzwe cyane n’urubyiruko mu gihe gito zirimo “Udukoryo twinshi” “Aisha” n’izindi.

Bamwe mu bantu bakurikirana muzika nyarwanda babwiye Umuseke ko iri tsinda ryatowe kubera ko  ariryo riri mu Rwanda ririmba rinabyina icya rimwe, bityo rero akaba ariyo mpamvu rishobora kuba ryaragize amahirwe yo kuza kuri urwo rutonde.

Si aba basore batunguranye gusa kuko  hanavuzwe byinshi kuri Teta Diana na Edouce ko batagombaga kuza kuri urwo rutonde. Ngo nta bikorwa bakoze bizwi.

Mu nama n’abanyamakuru kuri uyu wa gatatu tariki ya 5 Werurwe 2014 ubwo abayobozi bo muri Bralirwa na EAP (East African Promotors) batanzaga ko Knowless akitabiriye PGGSS IV, banavuze ko umuntu uri mu batoye afite uburenganzira bwo kujya kureba amajwi ya buri muhanzi kimwe n’umuhanzi wumva ko yagombaga kujyamo ariko ntatorwe.

Bongeyeho ko impapuro z’itora zihari uwashaka wese yakwisuzumira uko itora ryakozwe yazaza bakamwereka impapuro ryakoreweho.

Reba ‘Active’ ubwo bari mu gitaramo cyo gutora Nyampinga w’u Rwanda 2014.

Joel Rutaganda

ububiko.umusekehost.com