Eric Kalisa Salongo wayoboraga FEWABA yeguye

 Eric Kalisa Salongo wari perezida wa federation y’umukino wa basketball  mu Rwanda yeguye ku mirimo ye nkuko amakuru agera k’Umuseke.com abyemeza.

Impamvu zo kwegurakwe ntago ziramenyekana dore ko twagerageje kumuhamagara kuri telephone ye igendanwa ntibashe gucamo.

Mu minsi ishize, muri iyi Federation havuzwemo kutumvikana kwaje gutuma Vice President Munyangabe Pierre yegura, ndetse na Shema Maboko Didier wari ushinzwe Tekiniki nawe yegura nyuma ye gato, kubera kumusuzugura, kutumvikana, no kumunaniza nkuko yabitangaje.

Kuri iki cyumweru mu nama rusange ya FERWABA nibwo babonye ibaruwa y’ubwegure bwa Salongo, byatumye inama yagomba kwiga ku bibazo bya Shampionat, cyane cyane imikino yasubitswe n’ibirego by’amakipe nka Espoir, ahubwo yiga ku iyegura rya President nibiri bukurikire ubwo bwegure.

Ubusanzwe, amategeko ateganya ko iyo President yeguye, ajyana na Komite nyobozi ye. Amakuru atugeraho ni uko iyi komite ubu iyobowe by’agateganyo na Kayiranga Albert yahawe icyumweru cyo kugirango ifate imyanzuro ku cyo igomba gukora.

Salongo, yeguye nyuma y’umusaruro utarabaye mwiza mu ikipe y’igihugu yari mu mikino nyafrica i Maputo, ndetse na Shampionat irangwa n’ihagarara no kutumvikana bya hato na hato.

Umutoza w’ikipe y’igihugu ya basket Vechislav akaba nawe yarabwiwe ko amasezerano ye atazongerwa nyuma yo kwitwara nabi mu gihe amaze atoza amakipe y’igihugu  y’abagabo n’abagore.

Ubwanditsi
UM– USEKE.COM