Episode ya 61: Destine akojeje isoni Eddy mu bantu bari muri Restaurant!

Episode 61 ……..Hari umusore wavuye kuzana amazi yo kunywa mu kirahuri, si nzi ukuntu ukuguru kw’ameza kwamuteze agiye kwikubita hasi amazi yari afite mu kirahuri ameneka kuri Destine, ahita asakuza cyane.

Destine – “Oooooh my God! Aheeeeeee!!!!! Urambonera uyu muturage ibyo ankoreye!”

Salle yose yahise ihindukira, abantu barangarira aho twari turi, uwo musore na we atangira gusaba imbabazi ariko Destine ntiyabyumva ahubwo ahita amubwira.

Destine – “Ziba aho ngaho, sinshaka kumva ibyo ujajwa kuri njye, n’undi munsi wa…… Eddy  haguruka twigendere!”

Natekereje guhaguruka ngo ngende, ariko mbona byaba ari ubuswa, mpita ahubwo negera wa musore ntangira kumwihanganisha, ku bw’amagambo mabi Destine yari amaze kumubwira, rwose mu bari aho  buri wese yarabibonye ko uwo musore atabishakaga, bibaye mu buryo bwo kwiramira, abantu bose batangira kujujura, Destine na we abonye ko nta gahunda mfite yo kugenda ahita yikubita aragenda na njye nsigarana n’uwo musore.

Njyewe – “Bro, pole kabisa ku bibaye!”

We – “Ewana, uriya mu Cherie wawe anteje abantu ariko njye ndamwubashye nanze kumwandagaza, gusa uzamubwire acishe make ashobora kuzahura n’undi muntu utari njyewe!”

Njyewe – “Bro, ihangane buriya na njye arantunguye, sinari nzi ko bimeze kuriya, gusa mbabarira mu izina rye!”

We – “Muvandi kabisa uri umuntu w’umugabo, uzamuteremo umutima nk’uwawe, njye nitwa Eric hano Huye ni kavukire, naje mpagarariye company yacu tu!”

Njyewe – “Na njye nitwa Eddy, naturutse i Kigali!”

Uwo musore yahise yimura intebe araza yicara aho nari nicaye dukomeza kurya tuniganirira. Twakomeje kurya hashize akanya wa musore anyereka muri telephone ye, nsomye mbona handitse mo ngo “Chr Djalia” ndikanga ahita ambwira.

Eric – “Bro, nyihanganira ngusige hano, dore uyu mwana ambuze nababara, afite voyage hanze!”

Eric yahise agenda mpita nkubita agatima kuri Djalia nzi, umutima urikanga, ako kanya si nzi ukuntu nahindukiye mbona aho Jane  yari yicaye ntawuhari ntangira kurangaguzwa muri salle yose ngo ndebe ko yaba yimutse, ariko ndamubura,  ndahaguruka ndasohoka nerekeza aho chambres  zari ziri ndimo ngenda mbona message muri telephone yanjye, ndayifungura nsanga ni iya Destine. Yagiraga iti: “Eddy uracyari Restourant? Please umbabarire utaryama tutabonanye ndagushaka cyane.”

Nkimara kuyisoma nahise nibuka  byose byabaye mu gihe cy’amasaha atageze no kuri atanu, mbona Destine nubwo yaba afite urukundo,  akeneye amahugurwa y’ubumuntu, mu by’ukuri mu buzima bwanjye numvaga ntahuza amahitamo n’umukobwa utihangana, kuko nari nzi ko ari yo ntwaro yatumwe nsinda nkagera mu buzima nifuzaga kubamo.

Narakomeje ngana muri chambre yanjye ngera ku ya Destine ndayirenga ngera ku yanjye ndafungura, ngiye kwinjira Destine aba akinguye umuryango ahita ampamagara wagira ngo nari mpanyuze andeba!

Nkimukubita amaso nasanze yahinduye imyenda, yambaye agakabutura gato k’umweru n’aga singlet ka pink, ahita ambwira.

Destine – “Eddy sha umbabarire sinagutaye muri Restourant, ni uriya muswa wabiteye! Wabonye message yanjye se?”

Destine nashatse kumubwiza ukuri ko bidakwiye nk’umukobwa ariko mbona n’ubundi muri ako kanya ntacyo nafasha umutima we winangiye. Twari duhagaze ku muryango wa chambre yanjye akomeza kumbwira.

Destine – “Eddy, please  wambera umushyitsi basi nk’isaha imwe?”

Njyewe – “Waretse se ko….”

Destine ahita ansha mu ijambo.

Destine – “Nizere ko utagiye kumpakanira Eddy! Sha mbabarira!”

Numvise Destine anyinginga kandi ntakunda umuntu yanyinginga kuri service uko yaba imeze kose itagize icyo intwaye, ndamwemerera ngo numve icyo anshakira.

Twinjiye muri chambre ye, nicara ku gatebe kari gahari, na we yicara ku gitanda, dutangira kuganira, ntangira kwibagirwa byose, twagumye muri ibyo si nzi story namubwiye Destine araseka cyane, akomeza guseka, ageze aho mbona yirambitse ku gitanda atangira guhumeka cyane, mba ndikanze mpaguruka aho nari nicaye nihuta ngana aho yari ari, ndamwegera, mbona umwana w’umukobwa umwuka wamubanye muke nkuramo agapira nari nambaye ntangira kumuhungiza n’ubwoba bwinshi!

Nakomeje kumuhungiza, bigeze aho mbonye ntacyo biri gutanga, nkingura urugi ngo ngire uwo mpamagara ariko mbona nta muntu uri aho hafi, mfata icyemezo cyo kumuterura ngo musohore hanze abe ari ho nshakira ubufasha, mu gihe nkimukoraho n’akajwi gato  Destine aba arambwiye.

Destine – “Eddy, Eddy, mfatira mu gituza!”

N’ubwoba no gutitira narambitse ikiganza mu Gituza cya Destine, ariko nsenga Imana ngo inkize ikigeragezo nari mpuye na cyo. Hashize akanya gato Destine arongera arambwira.

Destine – “Eddy, Eddy, ubushyuhe  buranyishe!”

Nkibyumva nahise nongera nkuramo umupira ndahungiza, ndakomeza ndahungiza ari na ko nyuzamo nkakingura nkareba hirya no hino ko nta muntu mbona hafi, ngarutse nsanga Destine yakuyemo aga Single yari yambaye asigaranye akenda k’imbere ko hejuru, nsa n’uwikanze kubera ubwoba nari mfite n’ukuntu nabonaga Destine ahumeka, byose mbivamo negeranya imbaraga zanjye zose mba ndamuteruye ngize ngo nsohoke.

Destine – “Ahwiiiiii! Eddy!”

Njyewe – “Ihangane nkugeze hanze turebe uko wagera kwa muganga!”

Destine – “Ahwiiiii! Eddy oyaa, ndumva ntangiye koroherwa nsubiza hariya ku gitanda umbe hafi gusa!”

Namusubijeyo koko, kubera ko yari atangiye no kuvuga neza noneho ntangira kumva ubwoba havuyeho nk’ikilo! Namuryamishije ku gitanda nicara aho hafi nkomeza kumuhungiza, hashize nk’iminota itanu Destine afata ukuboko kwahungizaga ndecyera aho, nambara umupira wanjye.

Njyewe – “Desti, urumva umeze ute?”

Destine – “Ndi kumera neza sha!”

Njyewe – “None se byari bisanzwe bikubaho?”

Destine – “Si cya wowe se!”

Njyewe – “Basi ntabwo nari mbizi mbabarira!”

Destine – “Oya Eddy, ahubwo urakoze cyane kuntabara, igira hino ngushimire!”

Njyewe – “Imana ishimwe ahubwo, njye nari nabuze icyo nkora ni Imana ibikoze!”

Destine – “Nyine yakoreye muri wowe, ahubwo yambiii!”

Destine yarampobeye cyane na njye ndamuhobera, ngize ngo mvemo numva akomeje kumfata hashize umwanya muto mba ndamubwiye.

Njyewe – “Desti, birahagije ngaho ambara nkureke uryame uruhuke dore uvuye ahantu habi!”

Destine – “Uuuuh, Eddy, maze unsize nshobora kongera nkamera nabi, iyo byaje biba byaje ahubwo igumire hano nk’uku ngufasheho ndumva bigenda buhoro buhoro!”

Njyewe – “Eeeeh Desti, ese ubundi urwara iyihe ndwara?”

Destine – “Ni umwuka muke sha, nyine iyo ntari kumwe n’umuntu nshobora kuba nanapfa maze!”

Njyewe – “Noneho reka njye kukurebera wa Mwana nakubwiye twiganye aze mujye murarana!”

Destine – “Oyaaa Eddy, uriya ntabwo mushaka. Ubwo se wowe urabona yankorera nk’ibyo wowe wankorera, ubu se ko wari unteruye we yanshobora, mureke nyine nawe urahari!”

Njyewe – “Desti, ndumva ibyo aka kanya bitashoboka, hari igihe wenda bizaza mu gihe kiri imbere, ahubwo ubwo umeze neza noneho nagenda!”

Destine – “Eddy, umenye ko ari wowe watumye ngira ikibazo, nunsiga uraba utaye ubuzima bwanjye mu kaga!”

Nikije umutima ndeba ibigeragezo niteje, nicuza impamvu nemeye kuza muri chambre ya Destine, mu gihe nkibura igisubizo numva telephone yanjye irasonnye nkura mu mufuka, ndebye nsanga ni nimero ntazi.

Njyewe – “Desti, reka nitabe telephone gato!”

Destine – “Uuuuuh ese ubwo wayikupye ntabwo ubona ko  meze nabi?”

Ibyo Destine yabimbwiye natangiye kumwiyaka mba nkanze yes nshyira ku gutwi.

Njyewe-“ Hello!”

We – “Allooooo!!! Ni, Boss tuvugana ? Njye ndi Kadogo ye!”

Njyewe – “Eeeeh bite Sha Kado, ko umpamagaye bwije se ugize ikihe kibazo?”

Kadogo – “Eeh Boss  ntacyo nagiraga ngo numve ko icamo!”

Njyewe – “Hahhhhh, humura sha, icamo rwose!”

Kadogo – “Sawa rero ama Unites aranshiranye!”

Njyewe – “Sawa Sha!”

Nakuye telephone ku gutwi n’ibitwenge byinshi, Destine yigira hino acisha ukuboko hejuru amfata ku rutugu.

Destine – “Mbwira sha, ni iki kigusekeje?”

Njyewe – “Uuuuuuh aka kanya se wiyibagije icyari kiguteye ibibazo? Ahubwo reka ngende Desti ni ahejo!”

Nahise mpaguruka, nkigera ku rugi ngo mubwire muramuke.

Destine – “Uuuuuh, Eddy uremeye unsize hano!”

Njyewe – “Ihangane ntacyo uba Desti, nugira icyo uba turabimenya!”

Destine – “Ahwiiiiii! Erega na njye ntabwo ari njye, iyaba wari uzi ibindimo!?”

Numvise iryo Jambo rivuze byinshi, ndahindukira ndeba Destine.

Njyewe – “Desti, ariko ubundi wa mugani ndakeka atari iki wari wampamagariye, ahubwo ushatse wambwira.”

Destine – “Eddy mbwira, utambeshya ufite amatsiko y’ibiri kuba umunota ku wundi?”

Njyewe – “Desti, mbwira kuko nawe urabibona ko amatsiko nyafite!”

Destine – “Urakeka ari iki nshaka kukubwira?”

Njyewe – “Desti, ihangane niba ari njye bigenewe umbwire, ndakeka ari  ibitaguteye ipfunwe!”

Destine yahise ahaguruka aza ansanga aho nari mpagaze ku rugi, yitsa umutima ubugira kabiri, ubundi arambwira.

Destine – “………………………………………..”

Ntuzacikwe na Episode ya 62 hamwe na Eddy muri My Day of Surprise ………………………………

UM– USEKE.RW