Emile Bintunimana yegukanye Etape II ya Kigali >> Huye

Emile Bintunimana wa Team Muhabura niwe umaze kwegukana etape ya kabiri ya Tour du Rwanda ya Kigali>>>>Huye, yabifashijwemo cyane n’abasore bagize ikipe y’u Rwanda bakomeje gusatira. Abantu ibihumbi bari baje kwakira aba bakinnyi by’umwihariko na Abraham Ruhumuriza w’imyaka 36 wari ugarutse muri uyu mujyi akomokamo akanegukana umwanya wa gatatu.

Etape ya ka kabiri igitangira  Suleiman Kangangi wo mu ikipe ya Kenya yahise ‘acomoka’ mu bandi abajya imbere, bazamutse Kamonyi ari we ukiyoboye binjira Muhanga uyu akiri imbere.

Barenze i Muhanga Jérémy Bescond wo mu Bufaransa yasatiriye Kangagi baragendana, bari basize abandi hafi iminota ibiri.

Uko bagenda basatira za Ruhango peloton (igikundi) yari ibakurikiye yabasatiriye cyane hasigaramo amasegonda 25.

Binjiye mu Ruhango umugabo Abraham Ruhumuriza yacomotse mu gikundi kuri inyuma y’aba ba mbere arasatira, Ruhumuriza yagaragaraza ko yifuza kwegukana iyi etape yariho yerekeza mu mujyi wa Butare (iwabo ni i Save) aho akomoka.

Abakinnyi Hadi Janvier na Valens Ndayisenga, wagizemo akabazo k’igare, bari bagicungana na Debesay Mekseb bagendana nawe.

Bageze i Rusatira bari bamaze kwinjira mu karere ka Huye, Valens Ndayisenga yahise acomoka mu bandi nawe arasatiira, abakinnyi bayoboye isiganwa kuva ritangiye i Kigali uriya munya Kenya n’umufaransa bahise basubira inyuma muri peloton ikurikiye aba mbere.

Ruhumuriza yakomeje kubasiga, binjiye i Rubona rwa Ngunda yasize abandi ho amasegonda 28, bageze i Save umusore Ephrem Tuyishimire yakoze impanuka.

Bari hafi kwinjira mu mujyi wa Huye Aadel Reda w’ikipe ya Maroc yasatiriye bikomeye akurikirwa na Emile Bintunimana baca kuri Abraham Ruhumuriza ariko nawe abaguma hafi cyane.

Bazamuka mu Rwabuye amagare bayahagurukiye bose, baregerana cyane, Ruhumuriza akomeza kwigira imbere y’abandi benshi.

Emile Bintunimana w’imyaka 24 wa Team Muhabura niwe wanyonze kurusha abandi maze ageza igare rye ku murongo wa mbere yegukana aka gace ka Tour du Rwanda ka Kigali >>>Huye.

Valens Ndayisenga ufite Tour du Rwanda y’ubushize yavuze ko kuri we yishimiye ko bagenzi be bari gukora akazi neza. avuga ko kuri we bikimugoye kwegukana Etape kuko abakinnyi baje bose bamuzi iyo agiye kubavamo bamukurikira bakamunaniza ngo adatsinda, ariko ko azagerageza kwisubiza intsinzi muri etapes zisigaye.

Uko bahembwe:
Uwatsinze agace: Emile Bintunimana
Uwa mbere ku rutonde rusange (Maillot Jaune): Nsengimana Jean Bosco
Uwa mbere mu kuzamuka: Suleiman Kangangi (Kenya)
Uwa mbere mu banya Africa: Nsengimana Jean Bosco
Uwa mbere mu banyaRwanda: Nsengimana Jean Bosco
Uwa mbere mu bakiri bato: Nsengimana Jean Bosco

Uko bakurikiranye kuri Etape ya none

Uko urutonde ruhagaze ubu muri rusange

UM– USEKE.RW