DRC- Ikirunga cya Nyamuragira cyaba kiri kuruka

Amakuru aturuka muri  Congo aravuga ko kuri iki cyumweru ikirunga cya Nyamuragira  cyaba cyatangiye kuruka. Inzobere mu by’ibirunga zo mu burasirazuba bwa Congo zatangaje ko iki kirunga gishobora gutangira kuruka kuko nyuma yo kugenzura kuri iki cyumweru babonye ibikoma gisohora bitemba ku gasongero kacyo.

Julien Paluku Guverineri w’Intara ya Kivu ya ruguru kuri Radio Okapi yahumurije abaturage ko nubwo iki kirunga cyaruka kitaro buze kwerekeza mu mujyi wa Goma, ahubwo mu gice cya pariki y’ibirunga inyuma y’umujyi wa Goma.

Bamwe mu batuye mu Mujyi wa Goma babwiye umunyamakuru w’Umuseke ko bakomeje imirimo yabo nk’uko bisanzwe kuko babyiwe ko iki kirunga kiri kuruka cyerekeze ahitwa Tongo muri Rutchuru muri Repubulika iharanira Demokarasi ya Kongo.

Abahanga mu muterere n’imikorere y’ibirunga (volcanologists) bavuga ko ikirunga cya Nyamuragira ari kimwe mu birunga bikunda kuruka kurusha ibindi ku Isi. Barapimye basanga iki kirunga gishobora kuruka byibura inshuro imwe mu myaka ibiri n’ubwo kitaruka ibikoma (laves) byinshi ngo bisandare bikomeye.

Bagishyira ku rwego rumwe n’ikirunga cyitwa Mauna Loa cyo muri  Hawai’i.

Mu minsi mike ishize abahanga batanze umuburo ko icyi kirunga gishobora kuzaruka muri iyi minsi.

Iyi ni imyaka Nyamuragira yarutsemo:

1865, 1882, 1894, 1896, 1899, 1901, 1902, 1904, 1905, 1906(?), 1907, 1907, 1908, 1909, 1912-13, 1920, 1921-38, 1938-40, 1948, 1951, 1951-52, 1954, 1956, 1957, 1958, 1967, 1971, 1976-77, 1980, 1981-82, 1984, 1986, 1987-88, 1989, 1991-93, 1994, 1996, 1998, 2000, 2001, 2002, 2004, 2006, 2010, kuri 06, Ugushyingo 2011 ndetse no muri  Werurwe 2012.

Maisha Patrick
ububiko.umusekehost.com