Domitien Ndayizeye ntaziyamamariza kongera kuyobora u Burundi

Uwahoze ari Perezida w’u Burundi (2003-2005) Domitien Ndayizeye avuga ko ataziyamamariza kongera kuyobora u Burundi mu matora y’ubutaha. Avuga ko mbere yo gutekereza ku matora ngo umuntu agomba kubanza kwigwizaho imbaraga.

Uyu mugabo amaze iminsi aregwa gushaka gucamo ibice ishyaka rye FRODEBU, ubu ryacitsemo kabiri rigizwe na; Sahwanya Frodebu na  Frodebu Nyakuri Iragi rya Ndadaye.

Asubiza ikinyamakuru Iwacu-Burundi, avuga ko n’ubu ari kugerageza kunga iri shyaka afatanyije na Sylvestre Ntibantunganya, nawe wahoze ari Perezida w’u Burundi, bahuza Léonce Ngendakumana na  Dr Jean Minani bayoboye biriya bice byombi.

Gusa ngo ababazwa n’uko igice cya Sahwanya Frodebu kivuga nabi ibyo ari kugerageza gukora abahuza ngo bongere kuba ishyaka rimwe.

Ishyaka Sahwanya Frodebu ryashinzwe mu 1992 na Melchior Ndadaye ubu ryacitsemo kabiri, uyu mugabo Ndayizeye avuga ko ikibitera ari inyungu bwite za bamwe. Ndetse ababazwa n’uko ngo gutana kw’iri shyaka ariwe babigeretseho ubwo byabaga mu gihe ngo bari bariyoboye ari bane.

Domitien Ndayizeye ubu wagizwe Senateri avuga ko nubwo ishyaka ryabo riri mu bibazo ariko ngo yumva yizeye ko bizarangira vuba kandi bagatsinda amatora yo mu 2015 mu gihe FRODEBU izaba yongeye kwiyunga.

Ati “Urebye nta gutandukana kw’ibitekerezo kuri hagati y’ishyaka riyobowe na Ndendakumana n’icya Dr Minani.”

Ndayizeye avuga ko yumva ahagijwe n’umwanya afite ubu, akavuga ko mbere yo gutekereza kuba umukandida ku mwanya wa Perezida wa Republika umuntu agomba kubanza gukomeza indiba (hasi).

Ati “ Uyu munsi ntibyaba bikwiye ko ishyaka ryanjye ryinjira mu matora, mu gihe ishyaka ricitsemo ibice ntabwo ryayobora abantu muri demokarasi. Icya mbere ubu ni ugukora ibishoboka ishyaka rikongera kuba rimwe. Ni icyo ntekereza.”

Mu 2015 nibwo mu Burundi hateganyijwe amatora y’umukuru w’igihugu n’abagize inteko ishinga amategeko.

UM– USEKE.RW