Dj Zizou arashinjwa uburiganya bwatumye Austin ashyamirana na Kina Music

Imvo n’imvano y’iyi nkuru, n’indirimbo yitwa ‘Te Amo’ itaranasohoka yakozwe na Knwoless afatanyije n’Umunya- Zambia Roberto wamenyekanye cyane mu ndirimbo yise ‘Amarula’.

Iyo ndirimbo yateje umwuka utari mwiza hagati ya Uncle Austin na Kina Music, bivugwa ko Dj Zizou ariwe nyirabayazana dore ko ari nawe wari ufitanye gahunda na Austin byarangiye ataririmbye muri iyi ndirimbo ahubwo ikitirirwa Knwoless.

Mu ntangiriro za Gicurasi 2015 umuhanzi w’Umunya Zambia Robert Banda wamenyekanye cyane nka Roberto, nibwo yaje mu Rwanda mu gitaramo cya Comedy Night. Bityo aboneraho n’umwanya wo gukorana na bamwe mu bahanzi indirimbo.

Uncle Austin ni umwe muri abo bahanzi bagombaga gukorana nawe indirimbo nyuma biza kurangira uwo mushinga Dj Zizou awiyitiriye.

Mu kiganiro na Radio 10, abahanzi barimo Uncle Austin, Dj Zizou, Knwoless, Clement, Dj Pius na Roberto bagize icyo bavuga kuri ubwo bushyamirane.

Uncle Austin ari nawe uvuga ko yahemukiwe yagize ati “Roberto akigera mu Rwanda, ndi umwe mu bahanzi bagerageje kumusaba ko twakorana indirimbo anabinyemerera nta kiguzi runaka anciye.

Kubera ko hari umushinga wo gukorana indirimbo na Radio & Weasel n’abandi bahanzi bo mu Rwanda nari mfite, biba ngombwa ko mvugana na Dj Zizou uburyo twayikorana na Roberto.

Natanze imbaraga zanjye zose kuri Roberto kugirango abe yakwemera ko twakora iyo ndirimbo. Kuko sinavuga amafaranga natakaje ndetse n’ibindi bintu byinshi.

Naje kumufata mujyana muri Kina Music kuko nari namaze kuvugana na Dj Zizou ko ariho tugiye gukorera iyo ndirimbo ariko turi babatu, Roberto, Knwoless na Austin.

Ikintu cyambabaje ni uko naje kumva ko iyo ndirimbo yamaze kurangira ndetse nkanabibona ku ifoto Roberto yari amaze gushyira kuri Instagram ye.

Ngerageje kumubaza uko bimeze, ambwira ko atazi impamvu banze ko ndirimba muri iyo ndirimbo we yari azi ko nanjye nyirimo kuko arinjye wanamutwaye”.

Dj Zizou we yagize ati “Sinibaza ukuntu Uncle Austin yavuga ko iyo ndirimbo ari iye. Kuko nta jambo na rimwe ririmbwa muri iyi ndiirmbo yigeze yandika yewe nta kintu na kimwe yavuga ko ari icye.

Kuba yarazanye Roberto muri Kina Music ntaho bihuriye no kuba yaragombaga kuririmba mu ndirimbo izahakorerwa.

Uretse ko nta n’ubushobozi yari afite bwo kuba yatuma iyo ndirimbo ikorerwa byose birimo n’amashusho yayo kuko twagombaga kuyakorera muri Afurika y’Epfo”.

Knowless uza muri iki kibazo nk’umuhanzi wibiwe umushinga ariko atazi intandaro yawo, avuga ko bitakabaye ikibazo ahubwo hakabaye ubwumvikane hagati ya Dj Zizou na Austin.

Yagize ati “Narahamagawe nk’umuhanzi usanzwe ukorera muri Kina Music ndaza ndaririmba. Mu by’ukuri sinzi aho gukorana na Roberto byavuye kuko mu mushinga nari mfite wo gukora iyo ndirimbo ntabwo yari arimo”.

Clement umuyobozi mukuru wa Kina Music we yagize ati “Ibya Dj Zizou na Uncle Austin nibo bagombaga kumvikana. Kuko njye nakoze indirimbo nkuko nkora izindi zose sinarinzi ibyo bavuganye. Naho ibyo kuba wenda indirimbo yahagarikwa byo ntabwo bishoboka kuko yamaze kurangira”.

Dj Pius wanakoranye indirimbo na Roberto, yasobanuye ko Kina Music ari uburiganya bashaka kuzana kuri Uncle Austin. Kuko Pius ari umwe mu bagerageje kumvisha Roberto ko agomba gukorana na Uncle Austin indirimbo.

Uburyo Kina Music na Dj Zizou baje kwiyitirira uwo mushinga atazi uko byaje kuzamo.

Roberto umwe mu bagombaga kurangiza izi mpaka, yashimangiye ko indirimbo yayiririmbyemo aziko na Uncle Austin arimo. Nyuma aza gutungurwa no kumva atarimo kandi ariwe bari bafitanye gahunda.

Yagize ati “Nta muntu n’umwe nari nzi muri Kina Music. Uwo nzi ni Uncle Austin wagerageje kunsaba ko twakorana indirimbo nkaza kubimwemerera.

Naho kuba indirimbo yaraje kurangira ataririmbyemo ni amakosa kuko niwe wabinsabye nanabikoze kubera we”.

Nyuma y’iyi nkubiri y’amagambo hagati y’izi mpande zombi, Uncle Austin yatangaje ko iki kibazo kidashobora kurangirira aha. Ahubwo ko yiteguteguye gukora ibishoboka byose akarenganurwa.

Joel Rutaganda

UM– USEKE.RW