Diplomate yasinyanye amasezerano y’imikoranire na Touch Entertainment

Umuraperi Nuru Fassassi wamamaye cyane mu Rwanda ku izina rya Diplomate (DPG) mu ndirimbo ze zari zirimo amagambo agaruka cyane ku mateka n’abantu ba kera, yamaze kugirana amasezerano y’imikoranire na Touch Entertainment Group.

Nk’uko bitangazwa n’impande zombi, ayo masezerano akaba azamara igihe cy’imyaka itatu. Mu gihe imikoranire yaba ari nta makemwa bitewe n’ubwumvikane bw’imoande zose bakaba bayongera.

Diplomate avuga ko atagambiriye guhoza ku nkeke Touch Entertainement ngo bamukorere ibi n’ibi. Ahubwo ko agomba kubanza kureba niba hari ibyo akora byinjiza aho gushaka inyungu y’ibyo atinjije.

Mu kiganiro na Radio 10, yasobanuye ko rimwe na rimwe usanga hari abahanzi bashaka inyungu z’ibyo batakoreye. Ariyo mpamvu mu gihe ntacyo yinjije nta n’icyo agomba gushaka ko akorerwa.

Yagize ati “Mu masezerano mfitanye na Touch Entertainment Group, ni uko tugomba gutezanya imbere twese. Atari uko mfite amasezerano nkaba nakumva ko byose bigomba gukorwa.

Igihe ngezemo ni ugukora umuziki ushobora kumara igihe mu mitwe y’abantu. Ibyo byose bisaba ubuhanga mu myandikire n’ubutumwa indirimbo yawe ifite ari nabyo ubu mpugiyeho”.

Kuba Touch Entertaniment Group yarirukanye bamwe mu bahanzi nka Green P, Fazzo, Tony n’abandi, Diplomate avuga ko niba ntacyo binjizaga ibyabaye byari bikwiye.

Joel Rutaganda

UM– USEKE.RW