Diamond aracuruza indirimbo za Dj Pius ku 300 Tsh

Diamond Platnumz umuhanzi wo muri Tanzania ukunzwe cyane mu karere ugereranyije n’abandi, kuri ubu yatangiye gucuruza ibihangano bya Dj Pius wo mu Rwanda.

Ni nyuma yaho mu ntangiriro za Werurwe 2017 nibwo Diamond Platnumz yatangaje ku mugaragaro ko yafunguye ishami rya studio ye {Wasafi} mu Rwanda.

Icyo gihe akaba yaranyujije ubutumwa ku rubuga rwe rwa instagram avuga ko yafunguye amashami ya studio ye mu Rwanda, ko amarembo afunguye kuri buri muhanzi.

Yagize ati “Nshuti bahanzi b’Abanyarwanda, nejejwe no kubamenyesha ko kuva mu cyumweru gitaha ishami rya wasafi.com (urubuga rwa internet rwa Wasafi rucuruza indirimbo) rizafungurwa ku mugaragaro”.

Muri icyo cyumweru Diamond yatanze ku bahanzi b’Abanyarwanda, Dj Pius niwe muhanzi wahise yihutira gukorana n’urwo rubuga.

Ubu indirimbo ya Pius yashyizwe ku mashilingi ya Tanzania magana atatu {300 Tsh} angana n’amafaranga y’u Rwanda 150 frw n’umusago.

Mu minsi ishize, Diamond aherutse gutangaza ko umuhanzi wese wifuza gukorana na website ye yajya ku byicaro byayo biri mu nyubako ya Prestige muri etage ya nyuma cyangwa akaba yahamagara kuri 078953426.

Benshi mu bakurikirana ibijyanye n’imyidagaduro mu Rwanda, bavuga ko ubwo buryo bushobora gufasha abahanzi b’abanyarwanda kumenyekanisha umuziki wabo mu karere.

Bitandukanye cyane no kuba mu myaka umunani umuziki w’u Rwanda utangiye kugira icyo winjiriza abahanzi, ariko hakaba nta n’umwe ufite izina rizwi mu karere.

Joel Rutaganda

UM– USEKE.RW