David Beckham yatwaye igikombe arikumwe na LA Galaxy

Mu mukino wanyuma wahuje LA Galaxy na Houston Dynamo kuri iki cyumweru, LA Galaxy ya David Beckham, yabyitwayemo neza itwara igikombe ku ntsinzi y’igitego 1-0 cyatsinzwe na Donovan, kuri pass nziza yari ahawe na Beckham.

David Beckham abaye umukinnyi wa kabiri w’umwongereza utwaye ibikombe bya champion mu bihugu bitatu bitandukanye, nyuma ya Trevor Steven. Becks yatwaye igikombe cya champion arikumwe na Manchester united mu Bwongereza, arongera agitwara ari kumwe na Real Madrid muri Espagne, none ubu agitwaye ari kumwe na LA Galaxy, muri USA.

Mu gihe amasezerano ye afitanye na LA Galaxy azarangira tariki ya 31 ukuboza 2011, abajijwe kucyo atekereza ku kazoza ke, yatangaje ko agiye kubitekerezaho nyuma y’iyi ntsinzi yo kuri iki cyumweru. David Beckham yifuzwa n’amakipe menshi yo mu Bwongereza ndetse n’ubufaransa, ariko iyagaragaje ubushake kurusha izindi ni PSG yo mu bufaransa.

Tim Leiweke, ukuriye sosete ya AEG ifite LA Galaxy mu minwe, yatangaje ko agomba kwemeza Beckham akaguma mu ikipe nibura umwaka umwe wa Champion, cyane cyane ko azaherekeza iyi kipe gukina imikino ya gicuti iteganijwe mu ntangiriro z’ukwezi k’Ukuboza, muri Asia, na Australia. Abakunzi ba LA Galaxy bategereje bihanganye umwanzuro uzafatwa na Beckham, nyuma yo gutwara igikombe.

Egide Rwema
UM– USEKE.COM