Danny Usengimana yakuze afana Rayon no kuyikinira ni inzozi ze

*Amaze imyaka itatu gusa mu kiciro cya mbere

*Niwe munyarwanda wa mbere watsinze ibitego byinshi muri shampiyona imwe

*Yatojwe n’abatoza bane gusa kuva yatangira gukina

Rutahizamu wa Police FC nikipe y’igihugu Amavubi Danny Usengimana akomeje kubaka amateka muri ruhago y’u Rwanda kubera gutsinda ibitego byinshi mu gihe gito. Amateka y’uyu musore arimo gukura akunda Rayon sports kandi yifuza kuzayikinira mu buzima bwe.

Ibyishimo by’umupira w’amaguru bizingiye ku gitego. Bituma benshi mu bakunzi bawo iteka bakunda ba rutahizamu kurusha abandi bakinnyi mu kibuga. Umwe mu bakomeje kwigaragaza kurusha abandi mu Rwanda ni Danny Usengimana. Ari kwesa imihigo kandi adafite amateka maremare mu mwuga we.

Danny Usengimana yavukiye mu murenge wa Kimisagara wo mu karere ka Nyarugenge tariki ya 10 Werurwe 1996. Avuka kuri Sabomana Aboubakar na  Uwamaria Emma. Avukana n’abana bane.

Yakundaga umupira cyane kuko  se yari umufana wa Rayon sports byatumye nawe akura akurikirana amakuru yayo. Sina Jerome niwe yakundaga kurusha abandi bakinnyi.

Ubuzima bwe yabuyoboye mu mupira w’amaguru ubwo iwabo bimukiraga mu kagari ka Kabeza mu murenge wa Kanombe  wo mu karere ka Kicukiro. Yatangiye gukora imyitozo mu buryo buhoraho  muri Espérance FC yatozwaga na Kalisa Jean Paul muri 2009.

Uyu mutoza wanakoze muri Rayon sports yafashaga abana atoza kureba imikino yayo kenshi. Byatumye Danny Usengimana yumva gukinira Rayon sports ari inzozi z’ubuzima bwe.

Aganira n’Umuseke yagize ati: “Ndi umwana sinumvaga ko nzakina umupira w’amaguru by’umwuga gusa narawukundaga, nkafana cyane Rayon sports. Umubyeyi yakundaga kuyireba no kumbwira uko imikino iba yagenze. Maze kwiyumvamo impano y’umupira no kuwukina bihoraho natangiye kujya nyireba ikina noneho. Numvaga kuyikinira ari inzozi zanjye. N’ubu ntarirarenga. Gusa kuko ubu umupira ari umwuga wanjye kumvikana nayo byaterwa n’ubushobozi bw’amafaranga.”

Muri 2013 Danny Usengimana yatoranyijwe mu bana bagombaga kwiga umupira mu ishuri ry’umupira w’amaguru rya SEC. Yarikiniye amezi atandatu yitwara neza mu kiciro cya kabiri butuma Stephen Constantine amuhagara mu ikipe y’igihugu Amavubi makuru bwa mbere.

Ibintu byamushimishije kuko muri iyo kipe yahahuriye na rutahizamu afata nk’ikitegererezo Sina Jerome, n’abandi ba rutahizamu bari bakomeye nka; Jacques Tuyisenge, Daddy Birori, Jimmy Mbaraga, Meddy Kagere, na Ndahinduka Michel.

Uyu musore wari ufite imyaka 18 yagiye mu Isonga FC yatozwaga na Seninga Innocent yari mu kiciro cya mbere mu mwaka w’imikino 2014-2015. Umwaka wamuhiriye cyane kuko yatsinzemo ibitego birindwi.

Muri uyu mwaka wa mbere mu kiciro cya mbere umukino wamushimishije ariko ukanamutera ubwoba kurusha indi ni uwo yakinnye bwa mbere n’ikipe y’inzozi ze Rayon sports inyagira abana b’Isonga FC 5-0.

Nyuma y’uwo mwaka w’imikino yahise asinyira Police FC imyaka ibiri y’amasezerano. Ahabwa miliyoni 3 za ‘recruitment’, amafaranga menshi atatekerezaga kuzakorera mu buzima bwe.

Umwaka wa mbere muri Police FC yahise akora amateka atsinda ibitego 16 muri shampiyona ya 2015-2016. Aba umunyarwanda wa mbere utsinze byinshi mu shampiyona imwe. Uyu mwaka nawo yanditse andi mateka atsinda ibitego 11 mu mikino ibanza gusa (phase aller) bitarakorwa n’undi rutahizamu.

Danny Usengimana avuga ko ba myugariro bamugoye mu buzima bwe ari Abdoul Rwatubyaye na Nshutiyamagara Ismail Kodo. Ariko agashimira cyane abatoza bane gusa bamutoje kuva yatangira gukina bakamwigisha guhangana na bamyugariro bakomeye. Abo batoza ni; Kalisa Francois bitaga Mourinho, Habimana Sosthene, Innocent Seninga ndetse na Cassa Mbungo André

Uyu musore wifuza gutsinda igitego mu ikipe y’igihugu Amavubi muri uyu mwaka akanatsinda ibitego 20 muri shampiyona niwe ukomeje gufasha Police FC ubu iri ku mwanya wa gatatu n’amanota 28 irushwa amanota atanu na APR FC iyoboye urutonde rwa shampiyona.

Roben NGABO

UM– USEKE