Danny Nanone ntashimishwa n’abaca intege abahanzi

Umuhanzi Danny Nanone ukora injyana ya HipHop  aratangaza ko ababazwa no kubona hari abantu bamwe na bamwe baca abahanzi intege, bavuga ko nta nganzo bagira ahubwo bigana ibihangano by’abandi , ibyo bakunze kwita ‘Gushishura’.

Uyu muhanzi udakunze kuvuga byinshi yemeza ko abavuga biriya baba bahemukira umuziki nyarwanda ahubwo ko bagomba gufasha abahanzi gutera imbere aho kubaca intege.

Mu kiganiro na UM– USEKE , Danny Nanone yagize ati “Sinjya nshimishwa no kumva bamwe mu bantu bakabaye bafasha abahanzi gutera imbere ahubwo bagafata iya mbere mu kubasenya ngo ntacyo bazi.

Uyu muraperi kandi yahakanye amagambo amaze iminsi amuvugwaho ko hari abahanzi bagenzi be yibasira mu ndirimbo ze.

Yagize ” Abantu bamaze iminsi bambaza ko hari abahanzi nibasiye mu ndirimbo yanjye.  Nta muhanzi n’umwe mfite icyo mpfa nawe ku buryo namuririmba, ahubwo naririmbye muri bimwe nsanzwe mbonesha amaso yanjye.”

Mu ndirimbo aherutse gushyira hanze yise ‘Umuringa’ bitewe n’amagambo aririmbamo abantu bakurikirana muzika bari batangiye kuvuga ko yaba hari aho yibasira itsinda ry’abaraperi ‘Tough Gangz’, ariko ibi Danny arabihakana.

Abazi uko umuziki ukorwa bavuga ko uyu musore afite ubuhanga mu kazi ke bitewe n’imyandikire y’indirimbo ze n’uburyo awukoramo.

Umva indirimbo ‘Umuringa’ benshi bavuga ko Danny yaba yaribasiye bagenzi be.

Joel Rutaganda

ububiko.umusekehost.com