Cool Sniper, nyuma y’igihe abacungira umutekano, burya nawe ni umuhanzi

Uwihanganye Jean Claude (Cool Sniper) umwe mu basore bakora akazi ko gucunga umutekano w’abahanzi mu birori bitandukanye. Avuga ko amaze imyaka itandatu afite inzozi zo kugaragaza impano afite yo kurapa (Rap), ubu yabigezeho. Avuga ko aje gukumbuza no kwibutsa abantu injyana na Hip Hop Old Skul.

Mu 2008 yahatanye n’abandi irushanwa ryo kuzamura abahanzi ryari ryateguwe n’inzu ikorana n’abahanzi benshi bakomeye mu Rwanda ya Kina Music nk’umwe mu bahanzi izafasha kumenyakanisha.

Icyo gihe iryo rushanwa ryahaye amahirwe Muneza Christopher ubu ukunzwe cyane mu njyana ya R&B mu Rwanda,  Uwihanganye ntiyabonye gikurikirana kuva icyo gihe bituma impano ye idindira.

Cool Sniper yagiranye amasezerano na Kina Music mu mwaka wa 2009 nyuma yo kugaragara ku rutonde rw’abahanzi bitwaye neza. Gusa ngo ayo masezerano y’imyaka itanu yarangiye ntacyo ayakorewemo.

Cool Sniper yabwiye Umuseke ko nta muntu n’umwe yatunga urutoki mu idindira rye. Ahubwo ko ari umwanya wagiye uba muke bitewe n’izindi nshingano z’ubuzima yagombaga kubanza kwitaho.

Yagize ati “Ubu nanjye mba ndi umuhanzi umaze kugira aho ngera. Ariko burya bavuga ko impano idasaza iyo ugerageje kuyisigasira.

Kuva igihe ubu nibwo navuga ko nje nzi icyo nje gukora kandi nzi neza uko isoko rya muzika mu Rwanda rihagaze”.

Uyu muhanzi ubu yashyize hanze indirimbo yise “Imbere cyane” aririmbamo Hip Hip mu buryo bwa cyera. Avuga ko iyi njyana abantu bayikundaga ariko ubu itacyumvikana cyane bityo nawe ayigarukanye ngo akumbuze abayikundaga.

Umva indirimbo ye yise ‘Imbere cyane’ yamaze gushyira hanze.

Joel Rutaganda

UM– USEKE.RW