Congo: Inteko irakangurira inyeshyamba kudacikanwa n’imbabazi rusange

Nobert Ezadri Eguma, Umuvugizi w’Inteko Ishinga Amageko muri Repubulika iharanira Demokarasi ya Congo arasaba inyeshyamba zikorera mu mashyamba ya Congo gushyira intwaro hasi kugira ngo badacikanwa n’amahirwe y’ imbabazi rusange .

Agira ati:”Hari benshi banze gushyira intawaro hasi ngo bave mu mashyamba y’Ituringo baze bahabwe imbabazi rusange”.

Eguma avuga ko uyu mushinga w’itegeko watowe n’Inteko ari intambwe nziza yo kuzana ubumwe bw’Abanyagihugu no gushyiraho leta y’ubumwe.

Akomeza avuga ko imitwe itandukanye ikomeje  guteza umutekano mucye abaturage batuye Ituri, imwe muri yo twavuga  FRPI, uyoborwa na Cobra Matata.

Uyu mutwe umaze igihe usabwa gushyira intwaro hasi ngo abawugize basubizwe mu buzima busanzwe abandi bashyirwe mu gisirikare cy’igihugu ariko nta cyo babikoraho.

Imbabazi rusange zivugwa muri iri tegeko zireba igihe cyo kuva tariki ya 18 Gashyantare 2006 kugeza mu kwezi k’Ukuboza 2013.

Intumwa z’Umuryango w’Abibumbye zikorera muri Congo zirimo Martin Kobla na Mary Robinson  batangaje ko bishimiye  iri tegeko ngo kuko ari kimwe mu bintu byerekana ubushake bwa Leta ya  Congo mu gushyira mu bikorwa amasezerano ya Nairobi yagiranye n’abahoze ari inyeshyamba za mu mutwe wa M23.

Izi ntumwa nazo zahamagariye inyeshyamba zose kudacikanywa n’aya mahirwe zigashyira  intwaro hasi maze zikakira  imbabazi rusange.

ububiko.umusekehost.com