Confederation Cup: Hakizimana Louis azayobora umukino wa Young na MC Alger

Abasifuzi b’abanyarwanda bayobowe na Hakizimana Louis bita ‘Lu’ bagiriwe ikizere na CAF, bazayobora umukino ubanza wa CAF Confederation Cup uzahuza Young Africans na MC Alger.

Imikino y’ijonjora rya gatatu muri CAF Total Confederation Cup iteganyijwe mu mpera z’icyumweru gitaha. Umukino ukomeye mu karere ka Afurika y’Uburasirazuba uzahuza Young Africans Football Club yo muri Tanzania na Mouloudia Club d’Alger yo muri Algeria.

Uyu mukino uzabera kuri stade y’igihugu ‘Wanja Wa Taifa’ bita Benjamin Mkapa National Stadium yakira abantu ibihumbi 60 bicaye neza iri mu mujyi wa Dar es Salaam.

Louis Hakizimana bita ‘LU’ niwe uzayobora uyu mukino uteganyijwe tariki 8 Mata 2017. Azafatanya n’abandi banyarwanda; Theogene Ndagijimana na Jean Bosco Niyitegeka.

Hakizimana wabaye umusifuzi mpuzamahanga kuva muri 2012 yagiriwe ikizere cyo kuyobora umukino ukomeye, kuko uzakomeza muri aya makipe izabona itike yo kujya mu matsinda ya CAF Confederation Cup.

Roben NGABO

UM– USEKE