Coloneli Sadiki wa FDLR yarashwe na Mai-Mai Cheka

Umwe mu  ba komanda ba FDLR wari mu bakomeye bayobora izo nyeshyamba  muri Kivu y’amajyaruguru witwa Colonel Jean Marie Vienney KANZEGUHERA uzwi ku kazina ka Sadiki biravugwa ko yaba yishwe n’imwe mu mitwe yitwaza intwaro Mai-Mai sheka kuri iki cyumweru taliki ya 20 ugushyingo 2011.

Ibi byatangajwe na MONUSCO, umutwe w’ingabo za Loni (UN) ushinzwe amahoro muri Congo, ngo uyu Col Sadiki yarasiwe mu gico (ambush) yari yatezwe n’abarwanyi ba Mai Mai Cheka.

Colonel Sadiki umwe mu bayobozi b’imena ba FDLR   yari afite batayo yihariye ayobora yise “Sadiki Soleil”

Ubushyamirane hagati ya Colonel Sadiki na Mai–Mai Cheka bwakomotse ku  bwicanyi bwabereye ahitwa Kibua na Luvungi muri Kanama umwaka ushize 2010.

Hashingiwe kuri raporo y’impuguke za  Loni (UN) yo mu mwaka ushize wa 2010 muri Congo, FDLR na Mai-Mai babanje kujya bakorana. Mu bitero bagabye bafatanyije  harimo icyabaye hagati y’itariki ya 30 Nyakanga na 2 Kanama muri uyu mwaka ushize aho basahuye bakanica abantu mu nsisiro ebyiri za Kibua na Luvungi.

Muri ibyo bitero by’iminsi ine bafatanyije nkuko ishami rya MONUSCO riharanira uburenganzira bw’ikiremwamuntu ribitangaza, abantu barenga ibihumbi 3000 birahohotewe biganjemo abagore bafashwe ku ngufu.

Nyuma yo gukora aya mabi i Kibua na Luvungi, kubera igitutu cy’Umuryango w’abibumbye n’urukiko mpuzamahanga mpanabyaha rwa Arusha, ndetse n’ifatwa ry’umunyamabanga mukuru wa FDLR, Col Sadiki n’ingabo yari ayoboye zirangajwe imbere na Capt. Seraphin Lionceau, bafashe bamwe mu bayobozi bwa Mai-Mai Cheka babashyikiriza abayobozi.

Mubafashwe na FDLR harimo umukuru w’ingabo za Mai Mai Cheka witwa Sadoke Kikunda Mayele, ibi bikaba byarababaje cyane abarwanyi ba Mai Mai Cheka, bahise bavuga ko bazihorera ubugambanyi bwa Col Sadiki.

Iyicwa rya Colonel Sadiki wa FDLR, kuri Mai-Mai ikaba yarikoze mu rwego rwo kwihorera ku byo Colonel Sadiki bavuga ko yabakoreye.

Jean Paul Gashumba
UM– USEKE.COM