Col Byabagamba yibaza ibyo aregwa isomo bizasigira abanyarwanda

Col Tom Byabagamba wahoze ayoboye ingabo zirinda umukuru w’igihugu ari kuburanishwa n’inkiko za Gisirikari ku byaha byo kwakira imbunda mu buryo bunyuranyije n’amategeko ndetse no gukwirakwiza impuha zangisha rubanda ubutegetsi buriho. Mu rubanza kuri uyu wa 07 Ukwakira yavuze ko yibaza isomo urubanza rwe  ruzasigira abanyarwanda.

Col Byabagamba ashinjwa ibyaha bitatu byo guhisha nkana ibimenyetso byagaragaza uwakoze icyaha, gukwirakwiza impuha zigamije kugomesha rubanda no kuyangisha ubutegetsi buriho n’igikorwa cyo gusebya Leta ari umuyobozi.

Ubushinjacyaha buvuga ko Col Byabagamba yakiriye imbunda ebyiri za ‘Pistoret’ zivuye kwa Frank Rusagara  mu buryo bunyuranyije n’amategeko, bukavuga ko yazakiriye iwe nta bubiko buhaba bwazo ndetse akazihisha nkana kuko ubugenzacyaha bwaje kuzireba atarazitanga.

Ubushinjacyaha bwa Gisirikari kandi bwemeza ko atazakiriye mu kurengera inyungu za rubanda ahubwo yazakiriye nawe aziko bunyuranije n’amategeko kubera amasano n’ubucuti afitanye na Rusagara ndetse bahuriye no ku mugambi mubisha.

Col Byabagamba mu kwisobanura avuga ko nta tegeko ryamubuzaga kuzakira nk’umusirikari wari mu kazi ndetse niyo ziba izundi yashoboraga kuzakira kandi ngo usibye nawe ngo n’undi muturage yazandurura zandaraye mu rwego rwo kurengera inyungu za rubanda.

Ati“Ubu se koko abanyarwanda bari hano n’abatwumva bizabasigira irihe somo?..sinibaza  isomo ibi bizaha umuturage uzasanga imbunda zandaraye mu gihe umusirikari mukuru yazakiriye zikamukoraho.”

Ubushinjacyaha buvuga ko atagombaga kuzakira kuko niyo Polisi y’igihugu iba ariyo izibona itari kuzizana kwa Col Byabagamba kuko atariho haba ububiko bw’imbunda za RDF.

Me Gasore Gakunzi Vallery wunganira Tom Byabagamba we asanga ntacyari kubuza umukiliya we kuzakira kuko yari umusiririkari uri mu kazi ndetse imbunda zose zitabikwa mu bubiko bwazo.

Me Gasore kandi avuga ko ubushinjacyaha butagombaga kuvuga iby’amasano no kumenyana hagati ya Rusagara na Col Byabagamba kuko nta bufatanyacyaha baregwa.

Byabagamba atanga izindi mpamvu zatumye amarana iminsi itatu izo mbunda, yavuze ko yari arwaje umubyeyi we ndetse ari kwiruka mu byangombwa by’umunyeshuri wiga mu mahanga.

Ati“Bitewe n’ibintu nari ndimo iyi minsi itatu yambereye nk’umunsi umwe, ndetse na nyirazo Rusagara yari atarabazwa iby’izi mbunda.”

Nyuma y’impaka ndende Col Byabagamba n’umwunganira bakomeje kuvuga ko ntabimenyetso na bike bimuhamya ibyaha bityo akaba ariyo mpamvu yajuririye imyanzuro y’urukiko yo kumufunga by’agateganyo iminsi 30.

Ubushinjacyaha bwo buvuga ko guhishira imbunda iminsi itatu mu buryo butemewe n’amategeko ari ikimenyetso kiri mu bishinja Col Byabagamba ibyaha aregwa.

Kuri uyu wa kane nibwo urukiko ruzatanga imyanzuro.

BIRORI Eric
UM– USEKE.RW