Chine: Yakatiwe igihano cy'Urupfu kubera kugurisha abana bakivuka

Umuganga wita Zhang Shuxia wo gihugu cy’Ubushinwa yakatiwe igihano cy’urupfu kubera kugurisha abana bakivuka yarangiza  akabeshya   ababyeyi ba bo ko barwaye  byo gupfa cyangwa se bapfuye.

Uyu muganga wakatiwe igihano cy’urupfu yafashwe amaze kugurisha abana b’impinja bagera kuri barindwi. Yakoreraga ku bitaro biherereye mu Majyaruguru y’Uburengerazuba bw’Ubushinwa mu Ntara ya Shaanxi.

Uyu mugore  yakatiwe kuri uyu wa kabiri nyuma y’uko umwe mu bana yari yaragurishije apfiriye mu nzira ajyanywe na bo bafatanya muri ubu bucuruzi.

Al Jazeera dukesha iyi nkuru gitangaza ko Muganga Zhang yari afite akamenyero ko gufata abana bakivuka akabeshya ababyeyi ba bo ko barwaye barembye cyangwa akababwira ko bapfuye. Mbere yo kubaha ababajyana kubagurisha yabanzaga kwakira amafaranga ibihumbi 47 by’amayuwani ni ukuvuga amadorali 7800.

Urukiko rwaburashije uyu muganga rwamushinjije ko umwaka ushije yabyaje umugore abakobwa  babiri by’impanga yarangiza akamubwira ko nta mwana ari butahane kuko umwe yapfuye undi akaba avunitse amaguru n’amaboko.

Urukiko kandi rwavuze ko undi mwana uyu muganga yagurishije yatoraguwe yapfuye nyuma yo kujugunywa  mu kidendezi cy’amazi na bari  bamushyiriye abamuguze.

Umwana umwe w’umukobwa yamugurishaga amayuwani ibihumbi 20 n’ukuvuga amadorali 3310 n’aho uw’umuhungu yamugurishaga amayuwani ibihumbi 47.

Ibikorwa by’uyu muganga byamenyakanye mu mwaka wa 2013 aho umugore umwe witwa Dong yamuketse akamukurikirana nyuma akaza  kubimenyesha  Polisi maze atabwa  muri yombi muri Kanama 2013.

Bamwe mu bana yagurishijwe Polisi yagiye ibatahura ibazubiza ababyeyi ba bo.

Buri mwaka ibihumbi by’abana baburirwa irengero kubera ahanini itegeko ryo muri iki gihugu risaba abantu ku byara umwana umwe, yabona abyaye undi akamugurisha.

Ikindi kibitera ngo  ni umuco n’imyumvire yo muri iki gihugu ishyira imbere umwana w’umuhungu bigatuma rimwe na rimwe ubyaye umukobwa amuta cyangwa akamugurisha.

ububiko.umusekehost.com