Charles Bandora yakatiwe gufungwa imyaka 30

Urukiko rukuru ruhamije Charles Bandora icyaha cy’ubwumvikane bugamije gukora Jenoside, icyaha cyo kuba ikitso cy’abakoze Jenoside n’icyaha cyo kuba icyitso cyo kurimbura imbaga no kwica nk’icyaha kibasiye inyoko muntu. Urukiko rwamukatiye gufungwa imyaka 30. Uregwa yahise ajuririra uyu mwanzuro.

Abantu bagera nko kuri 60 bari mu cyumba cy’urukiko baje kumva urubanza rw’uyu mugabo woherejwe n’igihugu cya Norvege kuburanishwa ku byaha bya Jenoside yaba yarakoreye mu cyahoze ari Komini Ngenda mu Bugesera.

Bandora wari ukurikiranywe n’Ubushinjacyaha bw’u Rwanda; kuri uyu wa 15 Gicurasi Urukiko rukuru rwamuhamije biriya byaha bitatu gusa, ku bw’impamvu z’inyoroshyacyaha akatirwa gufungwa imyaka 30 aho kuba igifungo cya Burundu y’Umwihariko.

Umucamanza yavuze ko kuba kimwe muri ibi byaha harimo igihanishwa igifungo cya burundu y’umwihariko itegeko rigena ko nawe agomba guhanishwa iki gihano ariko yongeraho ko ku bw’impamvu z’inyoroshyacyaha agabanyirizwa igihano

Asobanura ishingiro ry’impamvu z’inyoroshyacyaha; umucamanza yavuze ko kuba Bandora ataragoye Urukiko; kuba nta bundi yigeze akatirwa ndetse akaba yaroherejwe n’inkiko Mpuzamahanga zitagira igihano cya Burundu y’umwihariko, uyu mugabo atagomba guhanishwa igifungo cya Burundu y’umwihariko, Urukiko rumukatira imyaka 30.

Iki cyemezo nticyanyuze uruhande rw’uregwa aho umucamanza akimara gusoma iyi myanzuro, Bandora yahise yaka ijambo; agira ati “ iki cyemezo mufashe ndakijuririye.”

Atanyuranyije n’umukiriya we; Me Bikotwa Bruce wunganira Bandora yavuze ko n’ubwo uwo bunganiraga yagabanyirijwe igihano batanyuzwe n’icyo yagenewe.

Yagize ati “ icyo twabivugaho ni uko tutabyishimiye, gusa tugiye gushaka kopi y’iyi myanzuro y’urubanza tuyisuzume ubundi tujurire nk’uko byatangajwe n’umukiriya wacu.”

Mu isomwa ry’uru rubanza urukiko rwibukije impande zombi n’abitabiriye iburanisha ibisobanuro byagiye bitangwa n’impande zombi mu kwiregura kwabo ari nabyo abacamanza bagiye bagenderaho mu busesenguzi bwabo bahamya cyangwa bahanaguraho ibyaha k’uregwa.

Mu kwiregura Bandora yakunze gusobanurira Urukiko ko inama yo ku itariki ya 07 Mata 1994 itari igamije gutegura no kunoza umugambi wo kurimbura Abatutsi nk’uko yabishinjwaga n’Ubushinjacyaha ahubwo ko yari iyo kwiga ku bujura bwari bwamukorewe.

Iyi nama ifatwa nk’izingiro ry’ibyaha byahamwe uyu mugabo.

Umucamanza yavuze ko ibyo abatangabuhamya bayitangajeho n’ubwo batahuzaga bifite ingingo zikiranuye ndetse bifite ishingiro kuko ubwo iyi nama yasozwaga hahise hicwa umututsi IPJ Mbarushimana Calixte ndetse interahamwe zigatangira guhabwa ibikoresho byo kwicisha.

Umucamanza yagaragaje ko Bandora nk’umwe mu bari bayirimo (v/Perezida wa MRND i Ngenda) yagize uruhare rukomeye mu byayikurikiye (Ubwicanyi n’ubusahuzi) bityo urukiko rumuhamya kugira uruhare fatizo rw’ubwicanyi bwakorewe Abatutsi barenga 500 bari bahungiye kuri Paruwasi ya Ruhuha n’abandi biciwe mu ngo.

Bandora w’imyaka 61 yahoze ari umucuruzi ukomeye mu Bugesera n’umuyobozi wungirije w’ishyaka rya  MRND mu cyahoze ari Komini Ngenda.

Umuvandimwe wa Bandora witabiriye iri somwa ry’urubanza wanakunze kugaragara mu maburanisha yabwiye itangazamakuru ko nawe atishimiye iki cyemezo.

Mu gusubiza asa nk’uwibaza ; yagize ati “ Yego Urukiko ruroroheje ariko se buriya ruroroheje koko?…kuba bari bavuze ko ataruhije Urukiko ndetse ko atigeze aba umunyapolotiki ku buryo bwumvikana, kubera iki bamukatira imyaka ingana kuriya?”

Uruhande rw’Ubushinjacyaha rwo rwavuze ko runyuzwe ariko ko kuba hari ibyaha byahanaguwe k’uregwa ari impamvu muzi yo kuba bugiye gusuzuma iyi myanzuro nk’uko byatangajwe n’umuvugizi w’ubushinjacyaha bw’u Rwanda Alain Mukurarinda.

Ati “ Muri rusange turanyuzwe ariko twumvise hari ibyamuvanyweho; tuzasoma iriya myanzuro turebe impamvu bashingiyeho babimuhanaguraho nidusanga harimo ikibazo nk’uko amategeko abitwemerera tuzabijuririra.”

Martin NIYONKURU
UM– USEKE.RW