Catherine Samba yatorewe kuyobora Centre Afrique

Centre Afrique, nyuma y’iyegura rya Michel Djotodia wari Perezida w’inzibacyuho utarabashije guhosha ubwicanyi, kuri uyu wa 20 Mutarama Inteko ishinga amategeko ya Centre Afrique yatoye madame Catherine Samba-Panza nka Perezida mushya w’iki gihugu mu gihe cy’inzibacyuho.

Madame Samba Panza yatsinze ku kiciro cya kabiri Desiré Kolingba bari babanje gusa n’abanganya amajwi mu kiciro cya mbere.

Catherine Samba-Panza watowe yari Umuyobozi w’Umujyi wa Bangui akaba yatsinze Désiré Kolingba, umuhungu wa André Kolingba wayoboye iki gihugu.

Uyu mugore abaye Perezida wa gatatu w’umugore ku mugabane w’Afurika nyuma ya Johnson Sirleaf na Joyce Banda wa Malawi.

Samba-Panza yagize amajwi 75 imbere y’uwo bari bahanganye wagize 53 nyuma y’uko bendaga kunganya amajwi mu kiciro cya mbere cyarimo amakandida bagera ku munani bahatanaga.

Imitwe y’abakristu muri iki gihugu yari yabanje kuvuga ko itemera ibiva muri ayo matora, nyuma yo kumva ko uwayatsinze ari uriya mugore yavuze ko ibyishimiye.

Mme Samba Panza ni umukristu ariko akaba muri iki gihugu afatwa nk’udafite aho abogamiye mu makimbirane amaze iminsi ashingiye ku myemerere, ndetse uyu mugore akaba ari umuherwe cyane ubusanzwe.

Uyu mugore ngo nta nahamwe ahuriye n’imitwe y’aba Islam yitwa Seleka ari nayo yahiritse ku butegetsi Francois Bozizé, ndetse ngo ntaho ahuriye n’imitwe ya Anti-Baraka y’abakristu nayo yishyize hamwe ngo irwane na Seleka.

Akimara gutorwa icya mbere yatangaje ni uko yifuza kugarura byihuse cyane umutekano n’amahoro mu gihugu cye.

Samba-Panza, yagiriwe icyizere bitewe n’uburambe amaze mu buyobozi, benshi bakamubona nk’umuntu ushobora kuba umuhuza ndetse ibyo avuga bikaba byakumvikana nk’umugore udafite aho abogamiye.

Muri Centre Afrique amakumbirane ashingiye ku madini amaze gutuma abantu hafi miliyoni bava mu byabo naho ibihumbi byinshi barishwe.

U Rwanda kimwe n’ibindi bihugu bitandukanye ubu byoherejeyo ingabo zo kugerageza kugarura amahoro.

Umuryango w’Ibuhugu by’Uburayi n’Umuryango w’Abibumbye bagiye guha iki gihugu kimaze igihe mu ntambara inkunga ingana na miliyoni 500 z’ama Euro mu rwego rwo kugitabara.

RFI

ububiko.umusekehost.com