Canada: Mungwarere yagizwe umwere

Kuri uyu wa 5 Nyakanga nibwo Urukiko rwisumbuye rw’i Ottawa muri Canada rwagombaga gufata umwanzuro mu rubanza ubushinjacyaha bumaze iminsi buregamo Jacques Mungwarere, washinjwaga ibyaha bya Jenoside yakorewe Abatutsi n’ibyaha byibasiye inyoko muntu mu 1994.

Umunsi ugeze, isaha yo gusoma urubanza nayo igeze umucamanza w’urukiko rukuru rwa Ontario, Michel Charbonneau yavuze ko Mungwarare ahanaguweho ibyo byaha byose bityo akaba abaye umwere.

Uyu mucamaza yavuze ko ubushinjacyaha nta bimenyetso bifatika bwabashije kugaragaza bigaragaza ko ibyaha yaregwaga yabikoze koko, ndetse ngo n’abatangabuhamya bashyizemo gukabya cyane mu mvugo zabo, abandi ngo bahimba ibimenyetso.

Ibiro Ntaramakuru bya Canada dukesha iyi nkuru byanatangaje ko, uyu mugabo yagizwe umwere no ku bindi byaha yashinjwaga birimo gutegura ibitero bwo kwica Abatutsi no gukwirakwiza intwaro zagombaga kubamara muri Jenoside ayakorewe Abatutsi mu 1994, aho yari muri Perefegitura ya Kibuye.

Uyu mugabo wahoze ari umwarimu, Jenoside ikaba yarabaye afite imyaka 22, yatawe muri yombi mu mwaka wa 2009. Ubwo urubanza rwe rwatangiraga kuburanishwa mu mizi mu mwaka wa 2012, yahakaniye urukiko ko nta byaha bya Jenoside cyangwa iby’intambara yakoze, akaba yari amaze ibyumweru 26 aburana; mu rubanza rwe yaburanaga avuye muri gereza yashyizwemo kuva muri 2009 nyuma yo gufatirwa i Windsor muri Ontario.

Uyu mugabo wahanaguweho ibyaha byose yari anakurikiranyweho uruhare yaba yaragize mu iyicwa ry’Abatutsi, muri Perefegitura ya Kibuye, cyane cyane mu bitaro bya Kibuye, aho byavuzwe ko we ubwe yifatiye imbunda akarasa bamwe mu bantu bari bahagotewe n’interahamwe zishaka n’ubundi kubica.

N’ubwo yagizwe umwere ariko abatangabuhamya bo ku Kibuye bamushinje ko ari umwe mu bicanyi baje bagahagarika amazi n’amashanyarazi mbere y’uko umutwe w’interahamwe zari zitwaje imihoro, imbunda, amagarenade binjira muri ibi bitaro bya Kibuye bakica abari barimo kuburyo harokotse mbarwa.

Ibi byose ariko Umucamaza Michel Charbonneau yabiteye utwatsi niko kumuhanagaguraho ibyo byaha, ubu akaba agiye kwidegembya.

Tubabwire ko uru rubanza rwasoje kuri uyu wa 5 Nyakanga 2013 rwari rwatangiye kuwa ya 28 Gicurasi 2012 rukageza kuwa 21 Werurwe uyu mwaka, rwumviswemo abatangabuhamya bagera kuri 44.

Uretse Dr Leon Mugesera woherejwe n’ubutabera bwa Canada kuza kuburanira mu Rwanda; Canada yaburanije n’undi Munyarwanda witwa Desire Munyaneza, we akaba yarakatiwe gufungwa ubuzima bwe bwose asigaye ku isi gusa iki cyemezo gishobora kuba cyavugururwa mu gihe cy’imyaka 25 nk’uko biteganywa n’amagegeko mpanabyaha y’igihugu cya Canada.

UM– USEKE.RW