Byemejwe ko Mashami atakiri umutoza mukuru wa APR FC

25 Mutarama 2015- Mukiganiro  n’abanyamakuru  ubuyobozi bwa APR FC bwemeje ko Vincent Mashami atakiri umutoza mukuru w’ikipe ya APR FC  bityo ikaba izayoborwa n’umutoza Dusan Dule Suljagic w’umyaserebiya wari usanzwe ushinzwe kongerera imbaraga abakinnyi (Phyical Coach),Mashami akazaguma amwungirije.

Nyuma y’igenda ry’umutoza Petrovic watozaga ikipe y’igisirikare cy’u Rwanda hakomeje kugaragara igisa n’akavuyo muri staff technique ya APR FC ahanini hatagara umutoza mukuru n’uwungirije.

Gusa aha ubuyobozi bwa APR FC bwavugaga ko yaba Mashami Vincent wahesheje APR FC igikombe cya shampiyona umwaka ushize ndetse na Dusan Dule waje nka ‘physical coach’ bombi ari abatoza bakuru ba APR FC.

Uyu munsi ku Kimihurura mu  kiganiro  n’abanyamakuru umunyamabanga mukuru w’ikipe ya APR FC Kalisa Adolphe bakunze kwita Camarade yatangaje ko ubu bamaze kwemeza ko umutoza mukuru ari uriya munya Serbia.

Kalisa ati “Ubu umutoza mukuru wa APR FC ni Dusan nyuma yo kugenda kwa Petrovic, Mashami akaba umutoza wungirije. Ni icyemezo twamaze gufatakandi ndumva  birasobanutse.”

Mashami yageze  muri APR FC muri Nzeli 2013 aje kungiriza umudage Andreas Spier wari umutoza mukuru wa APR FC, ubwo uyu yirukanwaga  Mashami yahawe ikipe anatwara igikombe cya shampiyona n’icy’Amahoro.

Nubwo agizwe umwungiriza ariko amaze amezi agera kuri arindwi kuburyo bwemewe n’amategeko atari umutoza w’iyi kipe kuko nta masezerano yari agifite.

Aha Kalisa Adolphe yavuze koko atari Mashami wenyine udafite ayo masezerano ati “ Yaba Mugisha w’abazamu ,yaba Didier Bizimana ubungirije nta masezerano bafite ariko  tubirimo mu gihe gito cyane barayabona”

Umutoza Mashami Vincent n’umwe mu batoza b’abanyarwanda bari kuzamuka muri iki gihe,  mbere yo kujya muri  APR FC yari yungirije Richard Tardy mu ikipe y’igihugu y’abatarengeje imyaka 17 yakinnye igikombe cy’Africa n’igikombe cy’isi ndetse aza no  gutoza Isonga FC nk’umutoza mukuru.

Jean Paul NKURUNZIZA
UM– USEKE.RW