Burundi: Nkurunziza kubaha itegeko nshinga biramunaniye

Mu gihugu cy’Uburundi abatavugarumwe n’ubutegetsi bakoze ibishoboka byose ngo barwanye ko Perezida ucyuye igihe Pierre Nkurunziza yareka kwiyamamaza ku nshuro ya gatatu ahinduye itegeko nshinga.

Ikigaragara izo mbaraga zose zabaye imfabusa kuko Perezida Pierre Nkurunziza aziyamamariza kuyobora igihugu cy’Uburundi kuri manda ya gatatu nk’uko byatangajwe na Minisitiri w’Umutekano mu gihugu, Edouard Nduwimana, weruye akavuga bwa mbere ko Nkurunziza aziyamamaza.

Minisitiri Nduwimana yatangaje ko Pierre Nkurunziza atigeze agira ubwiru umugambi we wo kwiyamamaza ku nshuro ya gatatu mu matora azaba mu 2015, gusa ngo yari yaranze kubishyira ku karubanda ariko noneho ngo iki ni igihe cyo kubitangaza.

Bisa n’aho uko abanyapolitiki batavuga rumwe na Nkurunziza barushagaho kumwotsa igitutu bamagana ibyo guhindura itegeko nshinga, byahaye Nkurunziza umwanya wogutanga bwangu ko aziyamamaza, ibi bikaba byanahise bitangazwa na Edouard Nduwimana.

Uyu akaba ari imwe mu nkoramutima za Perezida w’Uburundi, ndetse ari na we wahisemo gutangaza ku mugaragaro bwa mbere ko Nkurunziza azitabira amatora yo mu 2015 nk’umwe mu bahatana.

Edouard Nduwimana yagize ati “Icyo twamagana none ni uko hari abantu bashaka kumvikanisha ko indi manda ya Nkurunziza, idashoboka. Si byo na gatoya. Inama naha abanyapolitiki bashaka kwiyamamaza, ni ukwitegura bazi ko baziyamamazanya na Perezida Nkurunziza.”

Yongeyeho ati “Bizaterwa n’uko urukiko rurinda itegeko nshinga ruzabigena mu buryo ubu cyangwa buriya, kandi Abarundi barasabwa kuzabyemera.”

Minisitiri w’Umutekano arasa n’aho atangije impaka kuri iyo manda itavugwaho rumwe, nyuma y’igihe kitarenze icyumweru, inteko rusange y’abadepite ibuze ubwiganze mu guhindura itegeko nshinga byari guhita biha Nkurunziza amahirwe yo kwiyamamaza bwa gatatu.

Ibi byavuzwe na Minisitiri Nduwimana byamaganiwe kure n’abanyepolitike batavuga rumwe na leta.

Ishyaka UPRONA, ryatangaje ko kwiyambaza urukiko rushinzwe kurengera itegeko nshinga ari uburyo bwo gukoresha ingufu n’igitugu ku ruhande rwa Perezida Nkurunziza.

Ingingo ya 96 y’itegeko nshinga ryatowe mu 2005, hagendewe ku masezerano y’Arusha yarangije intambara yari mu Burundi (1993-2006), ivuga ko Perezida atorwa mu buryo butaziguye, kuri manda y’imyaka itanu ishobora gusubirwamo inshuro imwe gusa.

Charles Nditijé, perezida wa UPRONA avuga ko hakwiye kurwanya iyo manda ‘ngo kuko ibangamiye itegeko nshinga’.

Yabwiye RFI dukesha iyi nkuru ati “Rwose ni inzira y’amahane bahisemo kuva batangira gushaka guhindura itegeko nshinga. Abahagarariye abaturage bamaganye uko guhindura itegeko nshinga byaha Perezida kwiyamamariza indi manda ya gatatu.”

Charles Nditijé yongeyeho ati “Ubu ngubu, itegeko nshinga rirasobanutse, amasezerano y’Arusha arasobanutse. Tugomba kwitegura kwanga icyo gitugu, uko gukoresha imbaraga no guhatira abaturage ku ngufu.”

ububiko.umusekehost.com