Burundi: Kubona Essence byabaye ikibazo gikomeye mu mujyi wa Gitega
Ibigega bya Petrol biri hafi y’Umujyi wa Gitega Twitter
Amakuru ava i Burundi aremeza ko muri station icyenda zigurisha ibikomoka kuri Petrol mu mujyi wa Gitega wa kabiri muri icyo gihugu, nta gitonyanga cya Essence kiharangwa, gusa ngo gasoil yo iraboneka.
Ku isoko ritemewe kugurwaho Essence, L 1 yageze ku mafaranga ibihumbi bine y’u Burundi (FBU 4 000).
Iri bura rya Essence ryatangiye guteza ingaruka mbi mu biciro by’ingendo haba kuri moto no mu modoka.
Ingendo zishyurwagwa amafaranga y’u Burundi Magana atanu (FBU 500) uvuye mu mujyi wa Gitega rwagati ugana mu nkengero zawo, ziragenderwa ku mafaranga Magana arindwi y’U Burundi (FBU 700).
Ingendo ziva mu mujyi wa Gitega zerekeza nko mu bice bya Ruyigi, Bujumbura, Muyinga, Rutana, Ngozi na Mwaro ziyongereyeho amafaranga y’u Burundi igihugumbi ( FBU 1000).
Ku Munsi Mukuru w’Ijyanwa mu Ijuru rya Bikira Mariya wizihizwa na benshi muri Kiliziya Gatolika, iteke y’urugendo rwa moto kuva mu mujyi wa Gitega kugera ahitwa Mugera aho wizihirijwe, rwavuye ku mafaranga y’u Burundi ibihumbi bitanu (FBU 5000) rugera ku FBU 10 000.
Abatunzwe no gutwara abagenzi mu modoka baravuga ko bigoye kugira ngo babashe kubona ibibatungira imiryango.
SOS Media Burundi, yanditse ko abakuriye stations zicuruza ibikomoka kuri Peterol bavuga ko Essence itabuze kubera ko itari mu gihugu.
Abacuruza Essence bavuga ko ngo ibihe barimo byo kutayibona byatewe n’uko habayeho impinduka zo gusabwa uburenganzira ku muntu wese ushaka kurangura ibikomoka kuri Petrol (ibitoro).
SOS Media ivuga ko ububiko bwa Petrol buri ahitwa Tankoma muri km 5 uvuye mu mujyi wa Gitega, burimo Petrol.
Amakuru SOS ifite ngo ni uko imodoka nini zitwara Petrol ziyivanye i Dar Es Salaam muri Tanzania zitonze umurongo muremure kuri ubwo bubiko bwa Petrol.
Kuwa gatanu w’icyumweru gishize, SOS Media Burundi yari yanditse ko igiciro cya Essence cyazamutse mu mujyi wa Kirundo uherereye mu Majyaruguru y’Igihugu, aho L 1 yagurwaga hagati y’Amafaranga 4 000 na 5 000 y’u Burundi ku hantu hatemerewe gucuruzwa Essence.
SOS Media Burundi
UM– USEKE.RW
English