Burundi: Abatavuga rumwe na Leta bishimiye ko amatora yigijwe inyuma

Abo mu mashyaka atavuga rumwe na Leta mu Burundi bavuze ko bishimiye icyemezo cyafashwe na Leta cyo kwigiza inyuma italiki y’amatora y’Abadepite n’abakuru baza Komini. Aya matora yari ateganyijwe kuri uyu wa gatanu Kamena. Ubu Komisiyo y’amatora (CENI) irateganya gukora indi ngengabihe y’amatora nshya izemeranywaho n’inzego bireba.

Ku cyumweru  abakuru b’ibihugu byo mu karera k’Africa yo mu Burasirazuba, basabye Leta y’u Burundi kwigizayo aya matora  nayo irabyemera.

Hari amakuru avuga ko abatavuga rumwe na Leta ubu bamaze kwemera kugirana ibiganiro na Leta mu rwego rwo kurebera hamwe uko ubwumvikane bwagaruka.

Innocent Muhozi uyobora Radio Renaissance avuga ko ibiganiro biri hafi  gutangira hagati ya  Leta n’abatavuga rumwe nayo bikazibanda cyane kuri manda ya gatatu Nkurunziza ashaka kwiyamariza.

Muhozi avuga ko igitera abaturage kujya mu mihanda atari ukwanga manda ya gatatu ya Nkurunziza gusa ahubwo ari no kwerekana ko hari ibintu byinshi bitagenda neza mu buzima rusange bw’igihugu bityo abaturage bagakomeza kubaho nabi.

Yagize ati “Nkurunziza niwe kimenyetso cyerekana ukuntu Abarundi bamaze igihe bahohoterwa abandi bicwa ndetse n’ubukungu bukahazaharira. Bityo rero iyo abantu bigaragambya nta kindi  baba berekana uretse ibibazo byabazonze.”

Kugeza ubu abaturage baracyigaragambya ariko hamwe na hamwe batangiye gucogora nubwo mu cyaro naho byahageze.

UM– USEKE.RW