Buravani ashobora gusanga Active na Bulldogg muri Infinity

Yvan Buravani ni umuhanzi urimo kuzamuka cyane ugereranyije n’indirimbo afite zimaze kumenyekana. Kuri ubu ashobora kuba agiye gusanga abandi bahanzi bakomeye mu Rwanda mu nzu isanzwe ihuriwemo n’abo bahanzi izwi nka ‘Infinity’.

Mu ndirimbo zigera kuri eshatu zirimo, Majunda, Bindimo, Urwo nkukunda, afatanyije na Uncle Austin bamwe mu bamaze kuzumva bemeza ko uyu muhanzi yitaweho yagira icyo ahindura ku iterambere rya muzika.

Ashobora kwerekeza muri iyo label nyuma y’aho mu minsi ishize yatangarije Umuseke ko mu Rwanda hari abahanzi benshi b’abahanga ahubwo badafite aho bamenyekanira.

Ku ifoto yashyizwe hanze na Tizzo wo mu itsinda rya Active ribarizwamo abandi nka Derek na Olivis, bahaye ikaze Buravani mu nzu nshya itunganya muzika y’abahanzi nyarwanda.

Mu magambo yanditseho yagize ati “Ikaze mu muryango muvandimwe Buravani. Amashusho ya ‘Bindimo’ ari mu nzira araje ku bakunzi bawe”.

Ku ruhande rwa Buravani, yatangarije Umuseke ko ibyo agomba gukora nk’umuhanzi ngo abe yagirana amasezerano n’iyo nzu abyiteguye.

Ahubwo hasigaye kureba icyo amasezerano azaba avuga ndetse no kureba imigenzereze yayo mu ishyirwa mu bikorwa.

Joel Rutaganda

UM– USEKE.RW