Yohani ntiyahiriwe n’ikawa yihingira indimu ubu zimutunze n'abe

Iyimboneye Jean Pierre bita Yohani, Umuseke wamusuye tariki ya 11 Nyakanga 2014, avuga mbere yahinze ikawa ariko bitewe n’uko ubutaka bw’Ubugesera buteye ntiyamuha inyungu, abivamo ahita atangira guhinga indimu, amacunga na mandarine byo ngo abona hari icyizere cy’ubukire biri kumuha ubu.

Iyimboneye ni umugabo w’imyaka 60, yavutse mu 1954 mu cyahoze ari Perefegitura ya Gikongoro, abasha kwiga amashuri abanza gusa, mu 1968 ni bwo yageze mu Bugesera. Isambu nini afite, icyo gihe ngo yahaye Konsiye amafaranga y’u Rwanda 2 000 arayimuha.

Iyi sambu iri mu mudugudu wa Kiruhura, mu kagari ka Nyagihunika, mu murenge wa Musenyi mu karere ka Bugesera ari na ho atuye.

Mu kubyaza umusaruro isambu ye yayihingagamo ibintu byinshi ariko bikamutunga byo kurya gusa, ibijumba, ibishyimbo, amasaka, amateke…Nyuma yiyemeje kuyibyaza umusaruro bya kijyambere maze nyuma gato y’umwaka wa 2000 ateramo ibipimo by’ikawa ariko bimupfira ubusa abona nta musaruro bimuha.

Mu 2005 ni bwo yahinze indimu agira ngo agerageze arebe ko zo hari icyo zamufasha.

Kuva icyo gihe amaze gutera ibiti by’indimu n’izo mbuto zindi 1 200 biri ku buso bungana n’imingoti itatu. Umusaruro abivanamo uratangaje, ku mwero wabyo ibiti 10 abivanaho amafaranga 45 000.

Iyimboneye avuga ko imvura ibaye nziza, umushinga we wazamugeza ku bukire ikawa itamuhaye, avuga ko umuryango w’abantu batandatu atunze na we wa karindwi batajya babura amafaranga y’ubwishingizi mu kwivuza (Mutuelle de Sante) kandi ngo babayeho neza kubera indimu ze.

Indimu ze hari izo yabanguriye z’ikizungu, aho atuye imwe ayigurisha amafaranga y’u Rwanda 100 cyangwa 70Rwf . Avuga ko iyo ibihe byagenze neza yeza n’ibiro by’indimu birenga 1 000.

Uyu mugabo afite umukobwa warangije kwiga amashuri yisumbuye ariwe ubwe umurihiye amafaranga asaga 900 000 nk’uko yabitangarije Umuseke, ngo buri kantu kose yaguraga yarakandika.

Uko yandikaga amafaranga yatanze ku mukobwa we ni na ko yandika buri kantu kose yakoze mu murima we ndetse n’amafaranga yatanze ku muhungu we ubu wiga mu mashuri yisumbuye y’uburezi bw’imyaka icyenda.

Ibintu bisa n’ibitangaje ku mugabo nk’uyu wo mu cyaro kandi utarize amashuri ahambaye.

Iyimboneye avuga ko akeneye ubusha bw’inama z’abize iby’ubuhinzi ngo kuko kuva yatangira ubuhinzi bwe Agronome ntaramugeraho, ndetse ngo akeneye n’amahugurwa. Avuga ko imbuto ze zifatwa n’udukoko twitwa inanda tukangiza amababi ndetse tukanarya imitwe y’ibiti.

Icyo gihe rero ngo agura imiti imwe ntihure n’uburwayi bw’imbuto ze, yabona uburwayi bukomeje akibwira ko buzikiza yagira amahirwe bugakira.

Iy’imboneye akoresha ifumbire isanzwe y’amatungo kuko atunze ihene ebyiri, ariko ngo abonye inka byamufasha kuko ifumbire y’inka ngo ni nyinshi kuruta iy’ihene.

Iyimboneye yatangarije Umuseke ko indimu yerera imyaka itanu iyo uteye urubuto wahumbitse, ariko ngo hari uburyo batera umuzi, ukera nyuma y’imyaka itatu.

Abantu bamufashije kubangurira ibiti bye, ni abakozi b’ikigo cya ISAR ngo bigeze kujya mu Bugesera arabinginga abasaba ko bamubangurira ibiti baramwemerera none indimu yeza ebyiri zapima kg 1.

Iyimboneye Yohani abarizwa kuri telefoni 073 540 15 81.

HATANGIMANA Ange Eric
ububiko.umusekehost.com