Bayobozi b’inzego z’ibanze mwirinde kurya utwa rubanda tutari bunabahaze – Min. Kaboneka

Mu nama nyunguranabitekerezo yahuje abayobobozi bose batowe mu karere ka Nyarugenge, inzego z’umutekano ndetse na Minisitiri w’ubutegetsi bw’igihugu Francis Kabone yabaye kuri uyu wa kane, abayobozi b’inzego z’ibanze basabwe kwirinda kurya utw’abaturage tutaribunabakize.

Ku murongo w’ibyizwe muri iyi nama, harimo ibibazo bitandukanye birimo gutura mu manegeka no kubaka mu kajagari, ibibazo by’umutekano n’imiyoborere, ruswa, n’ibindi.

Ikibazo cyo gutura mu manegeka no kubaka mu kajagari biteye inkeke ndetse bikabangamira iterambere ry’umujyi, nicyo cyafashe umwanya munini cyane muri iyi nama.

Ubwo abayobozi batowe n’abaturage mu nzego z’ibanze bahabwaga ijambo ngo bagire icyo bavuga, bamwe muri bo batunzwe urutoki ‘Ruswa’ ko iri mu bituma hacyubakwa inzu zo mu kajagari, ndetse ngo ikanaba intandaro ya Serivise mbi z’abatanga ibyangombwa byo kubaka.

Bagaragaje ko ruswa iri mu bituma inzu zo mu kajagari zikomeza kubakwa kuko ngo inzu zubakwa abayobozi bareba kugeza zuzuye nyuma zikaza gusenywa n’ubuyobozi.

Uwitwa Nshakirabandi Evariste yagize ati “Ikigaragaza ko ruswa iriho, ko iribwa ni uko hari inzu z’akajagari zagiye ziboneka zubatswe, kandi zikubakwa abayobozi babireba zikarinda zuzura.”

Ntabuhungiro Jean Bosco, umuyobozi w’umudugudu wa Karama, Akagari ka Kamuhoza, mu Murenge wa Kimisagara we asanga icyaca imyubakire y’akajagari ari ubunyangamugayo bw’abashinzwe imyubakire.

Ntabuhungiro ngo yageze mu Mujyi wa Kigali mu 1971, n’ubundi hari Politiki yo kurwanya kubaka mu kajagari, ariko ngo abo Leta yahaga kurwanya kubaka mu kajagari byabateye gukira no kuzamuka vuba byihuse, kuko aribo ahubwo ngo babikora.

Ati “Igikwiriye ni ubunyangamugayo, kurwanya akajagari birasaba ubunyangamugayo no gukorera hamwe.”

Minisitiri w’ubutegetsi bw’igihugu Francis Kaboneka yasabye abayobozi mu nzego z’ibanze kuba inyangamugayo bakirinda kurya ruswa y’ubusabusa, kuko ngo iyo bariye ruswa y’umuturage akubaka mu kajagari baba bamuhemukiye.

Yagize ati “Muharanire kuba inyangamugayo mwirinde kwiyandarika, mwirinde kurya ubusa mushaka utuntu tutari bubakize, mwirinde umuvumo w’abaturage urarya umuturage ejo bamusenyera uwo muvumo we n’ayo marira ye azakugaruka uko bizagenda kose bitinde bitebuke, mwirinde uwo muvumo.”

Abatowe mu nzego z’ibanze kandi bavuze ko ikibazo cyo gutura mu manegeka no kubaka mu kajagari bitizwa imbaraga n’imitangire mibi ya Serivise mu bayobozi bashinzwe gutanga ibyangombwa byo kubaka.

Hategekimana Isimael, umuyobozi w’abikorera mu isoko rya Rwezamenyo yavuze ko asanga hari aho ubuyobozi bubishyiramo intege nkeya cyane cyane ubwo hejuru.

Ati “(Umuntu) ufite parcel ipimye, ifite ibyangombwa byo guturwamo kugira ngo abashe kubona icyangombwa cyuzuye cyo kubaka biragoranye. Umuntu arashaka icyangombwa cyo kubaka urugo kikamara amezi atandatu akanyura inzira ya panya.”

Kuri iki kibazo umuyobozi w’umujyi wa Kigali Monique Mukaruliza utemeranya n’ibyo Hategekimana Isimael avuga, yavuze ko muri Kigali umuturage usabye icyangombwa cyo kubaka ngo agomba gusubizwa bitarenze iminsi 21 , ngo iyo irenze umuturage agomba kujya kurega mu buyobozi.

Mu Karere ka Nyarugenge konyine habarurwa ingo 15 580 zituye mu manegeka zigomba kwimurirwa mu bindi bice.

Kuba umuntu atuye mu manegeke ni ukuba atuye ku musozi ahari ubutumburuke burenze 30%, aturiye inkengero z’ibishanga muri metero 20 cyangwa mu nkengero za ruhurura muri metero eshanu.

Callixte NDUWAYO
UM– USEKE.RW