Banki y’Isi yemeye gutanga miliyoni 200 z’amadolari yo kurwanya Ebola

Banki y’Isi yemeye  gutanga miliyoni 200 z’amadolari mu rwego rwo gufasha Guinea, Liberia na Sierra Leone guhangana n’ikwirakwira ry’icyorezo Ebola kimaze guhitana abatari bacye mu Burengerazuba bw’ Afrika.

Perezida wa Banki y’isi Dr Jim Yong Kim usanzwe ari umuganga yatangaje ko umuryango mpuzamahanga ugomba gutanga umusanzu ushoboka mu guhagarika umubare w’abakomeje guhitanwa na Ebola.

Yagize ati: “ Ndizera ko iyi nkunga ya Banki y’Isi yari ikenewe mu guhagarika ubukana n’ikwirakwizwa bya Ebola.”

Ishami ry’Umuryango w’Abibumbye ryita ku buzima OMS ryatangaje ko mu mibare iheruka y’abamaze kwandura iyi ndwara babarirwa ari 1,603, ikaba imaze guhitana abagera ku 887.

Abayobozi bakuru muri OMS  bemeza ko ubu Ebola iri kwerekana ubukana bukabije cyane cyane mu cyumweru turi gusoza kuko kuva kuwa 01 Kanama hagaragaye abantu bagera ku 163 banduye naho 61 bagahitanwa nayo.

Mu minsi ishize ibihugu birimo USA, Hong-Kong( giherereye mu Majyepfo y’Ubushinwa), mu Bwongereza, na Kenya byakajije ingamba zo kubuza Ebola kwinjira nyuma yo kwikanga ko hari abantu baturutse muri Nigeria, baciye mu bibuga by’indege bya biriya bihugu.

Amakuru aturuka atangwa n’Ikinyamakuru USA Today, aravuga ko hari undi Munyamerika wafashwe na Ebola, ubu akaba ari kuvurirwa mu bitaro bya Atlanta.

Mu munsi yashize Umunyamerika witwa Sawyer yitabye Imana azize Ebola nyuma yo gukora ingendo ava muri Nigeria akayandurirayo.

Martin NIYONKURU

UM– USEKE.RW