Banki y’isi igeneye akayabu Misiri na Tunisia

Mu itangazo  ryashyizwe ahagaragara kuri uyu  wa kabiri, banki y’isi iratangaza ko igiye kugenera miliyari 6 z’ amadolari y’ Amerika  igihugu cya Misiri na Tuniziya. Gusa ngo iyi nkunga ikaba yazakirwa n’ ibi bihugu mu gihe cyose ibi bihugu byaba bizanye impinduka ifatika mu bya politiki  no mu by’ ubukungu.

Misiri ikaba yaragenewe  miliyari 5 z’ amadolrari y’ Amerika , Aya  mafaranga agizwe na miliyari 1 na miliyoni 300 z ‘amadolari y’ inguzanyo . Miliyari 1 na miliyoni 300 z’ amadolari ya Amerika Misiri ikaba izayahabwa mu rwego rwo gushyigikira ingingo y’ imari y’iki gihugu . Miliyoni 200 z’amadolari akaba azakoreshwa mu kubaka ibikorwa remezo naho miliyari 1 y’ amadolari  akaba izakoreshwa mu bikorwa byo gutera inkunga ibigega by ‘imari  binyuze mu bindi bigega mpuzamahanga.

Tuniziya nayo  ikaba yagenewe inkunga ingana na miliyari 1na miliyoni 500. Miliyari 1 y ‘aya mafaranga akaba azashyirwa mu ngingo y’ imari y’ iki gihugu ndetse no mubikorwa by ‘ ishoramari. Miliyoni 400 akaba azashyirwa mu bikorwa by ‘ikigega cy’abikorera kugirango abishingire   mu bikorwa byabo.

Mu itangazo ryashyizwe ahagaragara  perezida wa banki y’isi  Robert Zoellick yagize ati :« ubu turimo gukorana  n’ikigega mpuzamahaga cy’ imari FMI n’ izindi banki z’ ubukungu mu rwego rwo kugerageza gushaka uko twafasha ubukungu bw’ibihugu byo muri aka gace, turatekereza ko kandi hari intambwe imaze guterwa na leta z’ inzibacyuho zashyizweho muri ibi bihugu ».

Ibi bihugu byahiritse ba perezida babyo   bikaba ubukungu bwabyo bwarahungabanijwe n’imvurururu z ‘abigaragambyaga. Urugero ngo ni nko mu gihugu cya  Misirir aho  ibicuruzwa byasohokaga muri Misiri byoherezwa mu mahanga byaragabanutseho ku kigero cya 40 % naho  ifaranga ryaho rigabanukaho  ku gipimo cya 12,1 %.

Tuniziya  yo yari ifite ubukerarugendo buteye imbere kuri uyu mugabane w’ Afurika kandi ikaba yarakuraga 7 % by ‘amafaranga yose yinjiraga mu gihugu aho ndetse  ubukerarugendo bwacyo  bwatangaga  imirimo  400 000 muri iki gihugu, muri Mutarama na Werurwe 2010 bukaba bwaragabanutse ku gipimo cya 45 % .

Mu nama y’ ibihugu  8 bikize cyane ku isi  ( G8) itaganijwe kubera  Deauville mu gihugu cy’ Ubufaransa  tariki 26 na 27  z’ukwezi kwa 5 , banki y’isi   ikaba iteganya ko aribwo izatangaza iby’ iyi nkunga ku mugarararo yageneye   ibihugu  bya Misiri na Tuniziya .

Jonas Muhawenimana

umuseke.com