Bahufite utoza Espoir BBC avuga ko hakiri kare ngo bizere igikombe

Mu mpera z’icyumweru gishize, Espoir BBC yatsinze IPRC-Kigali BBC 79-71, bituma ikomeza kuyobora urutonde rwa Shampiyona, ariko umutoza wayo John Bahufite ngo abona hakiri kare kwizera kwisubiza igikombe.

IPRC-Kigali niyo yayoboye mu duce dutatu twa mbere tw’umukino. Agace ka mbere karangiye IPRC ifite amanota 25-18 , aka kabiri karangira ku manota 49-34, naho aka gatatu karangira ifite 60-59.

Espoir BBC ariko nk’ikipe nkuru yaje kugaragaza ubunararibonye bwayo yigaranzura IPRC-Kigali, ndetse itsinda umukino ku manota 79-71.

John Bahufite utoza Espoir BBC yatangaje ko bigikomeye kuba bakwegukana igikombe, ariko akemera ko bakomeje kwiyongerera amahirwe kuko bakomeje gutsinda amakipe bahanganye.

Bahufite John aganira n’itangazamakuru yagize ati “Shampiyona navuga ko ikiri mbisi. Amakipe nk’ane yose afite amahirwe y’igikombe. Twishimiye kuyobora urutonde, tukaba tunakomeje gutsinda abo duhanganye. Gusa ni kare cyane, ntacyo kwishimira kinini gihari. Tumaze iminsi dutangira imikino nabi, natwe dufite byinshi byo kwikosora.”

Ubu, Espoir BBC niyo iyoboye urutonde rya Shampiyona y’ikiciro cya mbere by’agateganyo n’amanota 24, ikurikiwe na IPRCSouth yo ifite amanota 23.

Uko imikino yose yabaye kuwa Gatanu tariki ya 25 Werurwe 2016 yagenze;

Mu bagabo:

IPRC_South BBC 104-37 CSK BBC
U18 Boys Team 47-53 UR_Huye BBC
APR BBC 95-98 UGB BBC

Mu bagore:

IPRC_South BBC 49-61 Ubumwe BBC
The Hoops RWA 49-53 APR BBC.

Ngabo Roben
UM– USEKE.RW