AY yaje mu Rwanda gusubinaramo {Just a dance} na Buravan

Ambwene Allen Yessayah ukomoka muri Tanzania wamamaye cyane mu karere no muri Afurika ku izina rya AY, ari mu Rwanda aho yaje gusubiranamo na Yvan Buravan indirimbo ye yise ‘Just a dance’.

Ni nyuma y’aho agejejweho icyifuzo cyo kuba yakorana indirimbo na Buravan umwe mu bahanzi bakunzwe cyane muri iki gihe, AY ahitamo ko basubiranamo ‘Just a dance’ aho kuba bakora inshya.

AY yageze mu Rwanda ku wa kabiri tariki ya 2 Gicurasi 2017, iryo joro barara bakoze ibitero bizaba biri muri iyo ndirimbo.

Yvan Buravan avuga ko yatangajwe cyane n’ubuhanga yabonye kuri AY n’uburyo yisanzura kuri buri  muntu wese bidakunze kugaragara ku byamamare.

“Ni amahirwe nagize akomeye yo kuba nakorana indirimbo na AY. Kuko hari inzozi umuntu agira mu buzima hakaba n’iziza ariko ukumva ko ari ibinyoma. Aya mahirwe niyo ntangiriro yanjye y’ubuzima mu muziki”– Yvan Buravan

AY ngo yabanje gusaba ko iyo ndirimbo yasubirirwamo muri Tanzania akaba ari naho hafatirwa amashusho yayo. Ariko mu rwego rwo gushaka kumenyakanisha ko no mu Rwanda hari ahantu ndangaburanga, byaje kurangira byose bizakorerwa mu Rwanda.

Iyo ndirimbo irimo gukorwaho n’aba producers batatu bakomeye. Harimo Pastor P, Bob Pro na Producer wa AY witwa Hermyb. Amashusho y’iyo ndirimbo akazafatwa na Meddy Saleh.

Biteganyijwe ko AY azasubira muri Tanzania ku wa gatanu tariki ya 5 Gicurasi 2017 ari amashusho, ari n’indirimbo mu buryo bw’amajwi {Audio} byarangiye gutunganywa.

Iyi niyo ndirimbo irimo gusubirwamo na AY

Joel Rutaganda

UM– USEKE.RW