APR FC yageze mu Rwanda yizeye gutsinda Zanaco FC mu mukino wo kwishyura
Yannick Mukunzi, Usengimana Faustin na Emery Mvuyekure bagera ku kibuga cy’indege i Kanombe
Imikino ya CAF Champions League yatangiye muri iyi weekend. APR FC yatangiye neza inganyiriza 0-0 muri Zambia. Aimable Nsabimana watowe nk’umukinnyi w’umukino yizeye gutsindira Zanaco FC mu Rwanda.
Kuri iki cyumweru saa 01:30 nibwo APR FC yahagurutse i Lusaka muri Zambia ica i Addis-Abeba basoreza urugendo mu Rwanda. Bageze ku kibuga cy’indege i Kanombe saa 12:00.
Abatoza n’abakinnyi bakiriwe na bamwe bo mu miryango yabo n’abafana. Bashimirwa kwihagararaho bagize bashobora kunganyiriza hanze y’u Rwanda bibahesha amahirwe yo gukomeza mu kiciro gikurikiraho.
Myugariro ukiri muto wa APR FC Aimable Nsabimana yabwiye Umuseke ko ari ikipe ikomeye gusa idakanganye cyane. Ati:
“Ni ikipe nziza. Yateguye umukino mu buryo bwose. I Lusaka hari ibibuga byiza ariko batujyanye ku kibuga kibi bazi ko aricyo kitugora baratungurwa. Badusatiriye iminota nka 30 ya mbere ariko tuza kumenya guhangana nabo. Ni ikipe igizwe n’abakinnyi bakuze byatumye mu gice cya kabiri bibagora. Nizeye ko mu Rwanda tuzayitsinda tugakomeza mu kiciro gikurikira.”
Umukino wo kwishyura uteganyijwe kuwa gatandatu tariki 18 Gashyantare 2017 kuri stade Amahoro.
Roben NGABO
UM– USEKE
English